नेपालगन्ज: अविरल वर्षाका कारण हालसम्म ४८ जनाले अनाहकमा ज्यान गुमाएकाछन् । बिहीबारदेखिको भएको अविरल वर्षाका कारण देशभर बाढी र पहिरोका कारण हालसम्म ४८ जनाले ज्यान गुमाएका हुन् ।
यसरी ज्यान गुमाउनेहरुमा पुरुषको संख्या बढी भएको पाइएकोछ । प्रहरी प्रधान कार्यालयका अनुसार आईतबार बिहानसम्म २१ महिला र २७ पुरुष गरी जम्मा ४८ जनाको मृत्यु भएको हो । यस्तै २५ जना घाइते भएकामा उनीहरुको विभिन्न अस्पतालमा उपचार भइरहेको छ ।
यस्तै बाढि र पहिरोले वितण्डता मच्चाउँदा देशभरबाट २४ जना बेपत्ता भएकाछन् । प्रहरीका अनुसार ८ महिला र १६ पुरुष गरी जम्मा २४ जना वेपत्ता भएका छन् । यसैगरी बाढी र पहिरोका कारण देशभरबाट १ हजार १ सय ४ जनाको जिवितै उद्दार गरिएको छ ।
प्रहरीका अनुसार सबैभन्दा धेरै प्रदेश नम्बर १ मा १७ जनाको मृत्यु भएको छ । भने प्रदेश ३ मा १२ जनाको मृत्यु भएको प्रहरीको तथ्यांक छ । यस्तै हालसम्म काठमाडौं उपत्यकामा ८ जनाको मृत्यु भएको पाइएकोछ ।
प्रदेश नम्बर ५ अन्तर्गत पाल्पा र दाङमा एक–एक गरी जम्मा दुई जनाको मृत्यु भएको छ । भने कर्णाली प्रदेशको डोल्पामा पनि २ जनाको मृत्यु भएको प्रहरी तथ्यांकमा छ । जिल्लागत विवरणलाई हेर्दा ललितपुर र भोजपुरमा पाँच–पाँच जनाको मृत्यु भएको प्रहरीले जनाएको छ ।
