जानकी (बाँके) २३ वैशाख : बाँकेको जानकी गाउँपालिकामा नेपाली काँग्रेसबाट अध्यक्ष पदका उम्मेदवार छब्बन खाँका जित निश्चित भएको मतदाताहरुले बताएका छन् ।

यो पटको निर्वाचनमा खाँले बहुमत ल्याएर विजयी बन्ने उनीहरुले बताएका हुन् । गाँउपालिकाका सबै वडामा घरदैलो कार्यक्रममा व्यस्त खाँले यसपटकको निर्वाचनमा जनताले काँग्रेसलाई विश्वास गरेको बताए ।

‘गाउँपालिकाको जुन टोल,बस्ती जाउँ सबै ठाउँ काँग्रेसप्रति मतादताको लहर चलेकोछ । हामीलाई नै जिताउने प्रतिबद्धता समेत दिइरहनुभएको छ’ चुनावी प्रचारप्रसारमा ब्यस्त खाँले बताए ।

त्यस्तै नेपाली काँग्रेसबाट उपाध्यक्ष पदकी उम्मेदवार रामप्यारी यादवले पनि योपटक काँग्रेसले जानकीबासीको सेवा गर्ने मौका पाउने बताइन । यादव जानकीको सुस्त विकासलाई तीव्र गतिमा लैजान जनताले काँग्रेसलाई जिताउने बताइन् ।

घरदैलो कार्यक्रमअन्तर्गत आज शुक्रबार पनि काँग्रेस उम्मेदवारहरु दिनभर व्यस्त नै रहे । यसअघि जानकी गाउँपालिका वडा नम्बर १, २ मा घरदैलो गरीएकोमा आज वडा नम्बर ६ मा गरिएको हो ।

यस्तै पालिका उम्मेदवारहरुले वडा नम्बर–६ कोठारपुर, भाटनपुरलगायतका स्थानहरुमा घरदैलो गरेका छन् । प्रत्येक घरमा जनतासँग प्रत्यक्ष भेटेर उम्मेदवारहरुले भोेटका लागि अपील गरिरहेका छन् ।

मतदाता भेट गर्न घरघर पुगिरहेका खाँसहितको टोलीलाई मतदाताहरुले यसअघिको निर्वाचनमा जिताउन नसकेकोमा समेत दु:ख ब्यक्त गरे । उनीहरुले यसपटक खाँसहितको टिमलाई जिताएर जानकीको मुहार फेर्ने मतादताले बताएका छन् ।