नेपालगन्ज २८ चैत्र : पश्चिम नेपालको प्रशिद्ध बागेश्वरी मन्दिर परिसरभित्र रहेको विश्वकै एक मात्र जुँगे महादेवको मुर्ती भएको मन्दिर पुनः निर्माणको कार्य सुरु भएकोछ । नेपालगन्ज उप–महानगरपालिका वडा नम्बर–२ मा रहेको प्रसिद्ध बागेश्वरी मन्दिर परिसरभित्रको महादेवको उक्त मन्दिर पुनः निर्माण गरिने भएको हो ।

नेपालगन्ज उप–महानगरपालिकाले मन्दिर पुनः निर्माणका लागि दुई करोड रुपैयाँ बजेट विनियोजन गरिएकोछ । केही महिनाअघि मात्र मन्दिर पुनः निर्माणका लागि टेण्डर आह्वान गरी यतिबेला धमाधम काम गरिएकोछ ।

बागेश्वरी मन्दिर परिसरमा रहेको पोखरीमा जुँगे महादेवको पूर्ण कद भएको मुर्ती छ । उक्त मुर्तीमा पुजापाठ गर्न निर्माण गरिएको पक्की पुल हुँदै जानुपर्छ । मन्दिर पुनःनिर्माणका लागि पोखरीको पानी सुकाइ, मन्दिर र मूर्ति यथावत् राखेर प्रवेश मार्ग र पूजा गर्ने क्षेत्र फराकिलो बनाउन लागिएको हो ।

७ दिन लगाएर ‘समरसेल’बाट उक्त पोखरीको पानी फालिएको छ । सो पोखरीमा रहेका साना र ठूला माछालाई बाँकेको राप्ती नदिमा छाडिने भन्दै लगिएपनि नेपालगन्जको धम्बोझी स्थित वाटरपार्कमा छाडिएको छ।

नेपालगन्ज उप–महानगरपालिकाका प्रमुख प्रशान्त विष्टले एक वर्षभित्र निर्माण सम्पन्न हुने गरी काम शुरु गरिएको जानकारी दिए ।

मन्दिरसम्म पुग्नका लागि वर्षौँ पहिले बनाइएको प्रवेश मार्ग जीर्ण भएपछि उप–महानगरपालिकाले नयाँ निर्माण गर्न लागेको हो । ‘अहिले मन्दिरसम्म पुग्ने बाटो फराकिलो बनाइने छ,’ नगर प्रमुख विष्टले भने, ‘मन्दिरभित्रको पूजा गर्ने स्थान पनि फराकिलो हुनेछ ।’

नयाँ संरचना निर्माण भएपनि मन्दिरभित्रका घाटका क्षेत्र फराकिलो हुने उप–महानगरपालिकाले जनाएको छ ।

प्रसिद्ध बागेश्वरी मन्दिर परिसरभित्रको पोखरीको बीच भागमा रहेको जुँगे महादेवको मूर्ती रहेको मन्दिर भक्तजनको रोजाइमा पर्ने गरेको छ । जीर्ण र साँघुरो प्रवेश मार्ग रहेका कारण शिवरात्रिलगायत विभिन्न चाडपर्वको समयमा भक्तजनहरूको भीड हुने समयमा दुर्घटनाको जोखिम रहने गरेकोमा नयाँ निर्माण भएपछि भक्तजनलाई सहजता हुने भएको छ ।

मन्दिर पुनः निमार्ण योजनामा हाल प्रत्येक हप्ता सोमबार हुने महाआरती स्थलतर्फ रहेको घाट क्षेत्रमा थप घाट निमार्ण गरिनेछ । पूर्वपट्टि उत्तर र दक्षिणतर्फ घाटको क्षेत्र फराकिलो बनाइनेछ ।

जुङ्गेश्वर महादेवको मुर्ती रहेको स्थानको ठिक तल पोखरीमा गहिरो कुवा (ईनार) रहेकोछ । उक्त ईनारको वरिपरिबाट पर्खाल, पिलर उठाएर माथि ढलान गरिएकोछ। ढलान गरिएको स्थानमा जुङ्गेश्वर महादेको मुर्ती रहेकोछ । सो स्थानमा जुङ्गेश्वर महादेवको मुर्ती विक्रम सम्बद २००६ सालमा स्थापना गरिएको बताइएकोछ ।