नेपालगन्ज २१ चैत्र : दाङको लमिही नगरपालिका वडा नम्बर ३ बनगाउँमा यात्रुवाहक बस एकआपसमा ठोकिन पुगेकोछ । दुई यात्रुवाहक बस एक आपसमा ठोकिँदा २५ यात्रु घाइते भएको प्रारम्भिक जानकारी प्राप्त भएको हो ।

बुटवलदेखि बर्दियातर्फ आउँदै गरेको लु १ ख ७३३६ यात्रुवाहक बस र घोरही देखि बुटवलतर्फ जाँदै गरेको रा १ ख २५८१ नम्बरको यात्रुवाहक बस दाङ लमही नगरपालिकाको बनगाउँमा ठोक्किएर दुर्घटना भएको हो ।
दुर्घटनामा घाइते भएका दुई जनाको अवस्था गम्भीर रहेको छ, भने बाँकी यात्रुको अवस्था सामान्य रहेको जिल्ला प्रहरी कार्यालय दाङले जनाएको छ। 

गम्भीर घाइते हुनेमा राप्ती गाउँपालिका– २ लालमटियाकी ७८ वर्षीय चन्द्रकमला थापा र बस चालक गढवा गाउँपालिका– २ का लक्ष्मण थारू रहेका छन् । दुवैको लमही अस्पतालमा सामान्य उपचारपछि थप उपचारका लागि नेपालगन्ज रेफर गरिएको प्रहरीले जनाएको छ । 

बाँकी घाइतेहरूको लमही अस्पतालमा उपचार भइरहेको छ भने थप विवरण आउन बाँकी रहेको जिल्ला प्रहरी कार्यालय दाङले जनाएको छ।