नेपालगन्ज २२ चैत्र: जिल्ला प्रहरी कार्यालय बाँकेका प्रहरी प्रमुख एसपी सुवास बोहराले सम्पादक दामोदर भण्डारीलाई धम्की दिएकाछन् । 

सेतोखरी डटकम र सद्भाव दैनिक पत्रिकाका सञ्चालक, प्रकाशक तथा सम्पादक समेत रहेका दामोदर भण्डारीलाई भेटी अब समाचार नछाप्न भन्दै धम्की दिएको उनले बताए ।

यो पनि पढ्नुहोस्: बाँकेका एसपी सुबास बोहराले तस्करबाट यसरी उठाउँछन् पैसा

सद्भाव दैनिक एवं सेतोखरीमा प्रकाशित समाचारका बिषयमा जिल्ला प्रहरी कार्यालय बाँकेका प्रमुख एवं प्रहरी उपरीक्षक सुवास बोहराले नेपाल पत्रकार महासंघ बाँके शाखाका अध्यक्ष समेत रहेका उक्त पत्रिका–अनलाइनका सम्पादक दामोदर भण्डारीलाई समाचार रोक्न दिएको धम्कीपूर्ण दवावका बिषयमा बिहीवार नेपालगन्जमा पत्रकार सम्बद् संगठनहरुबीच आकस्मिक बैठक बसेको छ । 

जिल्ला प्रहरी प्रमुख बोहराले भण्डारीलाई समाचार रोक्न दिएको अनुचित धम्कीपूर्ण दवावप्रति गम्भीर चासो र चिन्ता प्रकट गर्दै समग्र जिल्लाको सुरक्षाको जिम्मेवारी निर्वाह गर्ने पदमा रहेको व्यक्तिले प्रदर्शन गरेको व्यवहार संविधानप्रदत प्रेस तथा अभिव्यक्ति स्वतन्त्रता बिरोधी रहेको बैठकले ठहर गरेको छ । 

आकस्मिक बैठकले यो लगायत पछिल्ला दिनमा राज्यका निकायबाट एकपछि अर्को गरी बाँकेमा पत्रकार एवं प्रेस स्वतन्त्रता माथि नियोजित तरिकाबाट प्रहार गर्ने गरी भइरहेका घटना रोक्न संयुक्तरुपमा प्रतिवादन गर्ने र निष्पक्ष एवं भयरहित तरिकाले पत्रकारिता गर्ने वातावरण निर्माणका लागि थप छलफल गरी धारणा सार्वजनिक गर्ने निष्कर्ष निकालेको छ । 

यो पनि पढ्नुहोस्: तस्करबाट रकम उठाउने बाँके एसपी सुवास बोहराको ‘कोर टिम’

छलफलमा महासंघ बाँकेका अध्यक्ष दामोदर भण्डारी, महासंघ लुम्बिनी प्रदेश समिति उपाध्यक्ष शुक्रऋषी चौलागाई, पूर्व केन्द्रीय सदस्य झलक गैरे, पूर्व अध्यक्ष निरज गौतम, पूर्व अध्यक्ष रुद्र सुवेदी, प्रेस चौतारी बाँकेका अध्यक्ष दुर्गा रोकाय, प्रेस युनियनका अध्यक्ष प्रियास्मृती ढकाल, प्रेस सेन्टरका अध्यक्ष राजेश आचार्य सहित अग्रज पत्रकार एवं महासंघका पदाधिकारी एवं सदस्यहरु सहभागि रहेको थियो । बैठकले बिहीवारको छलफलका आधारमा थप धारणा सार्वजनिक गर्दै अघि बढ्ने निष्कर्ष निकालेको छ ।

यो पनि पढ्नुहोस्: बाँके प्रहरी अबैध रकम असुली धन्दामा, तस्करी र अवैध आयात ह्वात्तै बढ्यो