नेपालगन्ज १० जेठ : नेपाल पत्रकार महासंघ बाँके शाखाको ३ वर्षे कार्यकालका लागि चुनावी सरगर्मी सुरु भएको छ । महासंघको बाँके शाखाले केन्द्रको निर्धारित कार्यक्रम अनुसार अधिवेशन र निर्वाचनको तयारी थालेसँगै चुनावी सरगर्मी सुरु भएको हो ।

नेपाल पत्रकार महासंघ, बाँके शाखाले जेठ २६ गते हुने निर्वाचनका लागि निर्वाचन समिति र १९ गते हुने साधारणसभामा वितरण गरिने पुरस्कार छनोटका लागि छुट्टा–छुट्टै समिति गठन गरेको छ ।

शाखाका अध्यक्ष दामोदर भण्डारीको अध्यक्षतामा बसेको कार्यसमितिको बैठकले पत्रकार शरण कर्माचार्यलाई मुख्य निर्वाचन अधिकृत तोकेको छ भने निर्वाचन अधिकृतमा अधिवक्ता केशव कोइराला र पत्रकार दीपेन्द्र धिताललाई नियुक्त गर्ने निर्णय गरेको छ ।

महासंघको १४ औं सभाधारण सभामा वितरण गरिने विभिन्न पुरस्कारको छनोटका लागि पत्रकार एवम महासंघ बाँकेका पूर्वअध्यक्ष समेत रहेका रुद्र सुवेदीलाई छनोट समितिको संयोजक बनाइएको छ । छनोट समितिको सदस्यमा डक्ट धिताल र नविन गिरी रहेका छन् । धिताल प्रेस सेन्टर र गिरी युनियनकर्मी हुन् ।

महासंघ बाँकेका सचिव कमल डाँगीका अनुसार, शाखाको अधिवेशन एवं १४ औं साधारण सभा जेठ १९ गते गरिदैँछ । त्यसका लागि अध्यक्ष भण्डारीको संयोजकत्वमा मूल आयोजक समिति गठन गरिएको छ ।