नेपालगन्ज १३ जेठ : नेपाल प्रेस युनियनको ३३ औं स्थापना दिवसको अवसरमा बाँकेमा पत्रकारहरुका लागि निःशुल्क स्वासथ्य परीक्षण शिविर गरिएको छ । युनियन बाँकेले स्थापना दिवसको अवसरमा सम्पूर्ण पत्रकारहरुका लागि आईतबार नेपालगन्जमा निःशुल्क स्वास्थ्य परीक्षण शिविर सञ्चालन गरेको हो । 

युनियन बाँकेका अध्यक्ष प्रियास्मृति ढकालको अध्यक्षतामा सञ्चालन भएको शिविरको उद्घाटन शत्रमा बोल्दै नेपाली काँग्रेस लुम्बिनी प्रदेश सदस्य एवम् स्वास्थ्य बिभाग प्रमुख अञ्जना पाण्डेले आफ्ना लागि कुनै सेड्युल नहुने पत्रकारहरु लक्षित शिविरको सराहना गरिन् ।

‘राज्यको चौथो अंगका रुपमा रहेको पत्रकारिता क्षेत्रमा लाग्ने पत्रकारहरुलाई आफ्ना लागि समय नै हुँदैन,’ स्वास्थ्य बिभाग प्रमुख पाण्डेले भनिन्, ‘प्रेस युनियनले सधै अरुलाई सुसुचित गर्ने जिम्मेवारी बोक्ने पत्रकारहरुका लागि स्वास्थ्य शिविर आयोजना गर्नु आफैमा एकदमै राम्रो कार्य हो ।’

पत्रकाहरुको कार्यप्रति उच्च सम्मान रहेको बताउँदै उनले पत्रकारिताको आचारसंहितालाई ध्यान दिन दिनुपर्छ नाकी सञ्चारमाध्यमको फोलोवर र सब्सक्राईब बढाउनका लागि सत्य तथ्यलाई भुल्न नहुने उनको जोड थियो । 

कुनै बेला आफु पनि पत्रकार बन्न लालयित रहेको कुरा केलाउँदै स्वास्थ्य बिभाग प्रमुख पाण्डेले समय र अवस्थाले आफ्नो संलग्नता स्वास्थ्यतर्फ क्षेत्रमा भएको बताइन । पत्रकारका लागि आचारसंहिता रहेको र सो नीति नियमभित्र रहेर कार्य गरिएकै कारण राज्यले पत्रकारितालाई चौथो अंङ्गका रुपमा परिभाषित गरेको उनले उल्लेख गरिन् । 

नेपाल प्रेस युनियन लुम्बिनी प्रदेशका महासचिव नविन गिरीले पत्रकारिता क्षेत्रमा देशकै जेठो संगठनका रुपमा रहेको युनियनले नेपाली पत्रकारिता क्षेत्रमा ईतिहास बनाएको बताए । उनले लोकतान्त्रिक आन्दोलन पश्चात उदय भएको युनियनले देशमा लोकन्तन्त्रका लागि पनि ठुलो भूमिका निर्वाह गरेको धारणा राखे ।

उद्घाटन शत्रमा नेपाल पत्रकार महासंघ बाँके शाखा उपाध्यक्ष संगिन शर्माले युनियनले आयोजना गरेको स्वास्थ्य शिविर कार्यक्रमका लागि धन्यवाद दिए । उनले युनियन बाँकेले निरन्तर रचनात्मक कार्य गर्दै आएको उल्लेख गर्दै स्थापना दिवसको शुभकामना दिनुका साथै युनियनको कार्यलाई अन्य सिको गर्नुपर्ने बताए ।

पत्रकार महासंघका पूर्व अध्यक्षहरुको तर्फबाट अग्रज पत्रकार निरज गौतम, प्रेस सेन्टर लुम्बिनी प्रदेशका उपाध्यक्ष प्रदीप वाग्लेले स्वास्थ्य शिविरले पत्रकारहरुलाई स्वास्थ्तर्फ सचेत हुनुपर्ने भावना विकास गर्न प्रेरित गर्ने कुरामा जोेड दिए ।

शिविरमा युनियन लुम्बिनी प्रदेशका उपाध्यक्ष जयसिंह केसी, महासंघ लुम्बिनी प्रदेश उपाध्यक्ष शुक्रऋषि चौलागाई, युनियन लुम्बिनी प्रदेश सदस्य गौरव गिरी, युनियन कर्णाली प्रदेश सचिव रमा केसी, महासंघ लुम्बिनी प्रदेशका सचिव शिव सुनार, महासंघका पूर्व महासचिव पोषण केसी, महासंघ बाँके शाखा अध्यक्ष दामोदर भण्डारी, प्रेस चौतारी बाँकेका अध्यक्ष दुर्गा रोकाय, युनियन बाँके शाखाका निर्वतमान अध्यक्ष अर्जुन ओली तथा निर्वतमान सचिव विजय मल्ल लगायतको सहभागिता रहेको थियो । 

नेपालगन्ज गणेशमान चोकमा रहेको लक्ष्मी सरस्वती पोलिक्निनिक एण्ड डाइग्नोष्टिक सेन्टरको सहकार्यमा गरिएको स्वासथ्य शिविरमा पश्चिम नेपालका एक मात्र नेफ्रोलोजिष्ट (मृगौला रोग बिशेषज्ञ) डाक्टर शौरभ सिंह हमालले बिशेषज्ञ सेवा प्रदान गरेका थिए ।

पछिल्लो समय मानिसको मृत्यु हुने सातौं समस्याका रुपमा मृगौला रोगको कारण देखिएको डाक्टर हमालले जानकारी दिए । युनियन बाँके शाखा उपाध्यक्ष कमल खत्रीले स्वागत गरेको कार्यक्रमलाई सचिव भिष्म लोधले सञ्चालन गरेका थिए।
यसअघि दिवसका अवसरमा युनियन बाँकेले मैत्रीपूर्ण फुटसल प्रतियोगिता सम्पन्न गरिसकेको छ । आइतबर सम्पन्न स्वास्थ्य शिविरमा बाँकेका ५५ बढी पत्रकारहरुले सेवा लिएका छन् ।