नेपालगन्ज २ साउन : बाँकेको कोहलपुरबाट ‘प्रहरीका डिएसपी’ पक्राउ परेकाछन् । प्रहरीका नक्कली डीएसपी बनेर ठगी गर्दै हिँड्ने ती युवकलाई बाँके प्रहरीले कोहलपुर नगरपालिका वडा नम्बर–११ एनटिभीबाट पक्राउ गरेको हो । 

जिल्ला प्रहरी बाँकेको टोलीले दैलेख नारायण नगरपालिका–५ घर भएर बाँके बस्दै आएका ३० वर्षीय नैनसिंह बिकलाई पक्राउ गरेको हो ।

पक्राउ परेका नैनसिंह बिकले विगत ३ महिनादेखि आफूलाई कहिले सीआइबी र राष्ट्रिय अनुसन्धानको डीएसपी भन्दै सर्वसाधारणलाई ठगी गरेको आरोपमा प्रहरीले पक्राउ गरेको जनाएको छ । 

पक्राउ परेका नक्कली प्रहरीका डिएसपी बिकले विगत तीन महिनादेखि बाँके जिल्लाका विभिन्न सरकारी कार्यालयहरुमा गई कहिले आफु सिआइबी प्रहरीको र कहिले राष्ट्रिय अनुसन्धानको डिएसपी नविन शाही हुँ भनी अनुगमनको शिलसिलामा आएको हुँ भन्दै कार्यालय प्रमुख र अन्य कर्मचारीहरुलाई भेटने, कुराकानी गर्ने र सर्वसाधारणलाई ठगी गर्ने गरेको भन्ने सूचना प्राप्त भए पश्चात ईलाका प्रहरी कोहलपुरका डीएसपी धर्मराज भण्डारीको टोलीले उनलाई हिजो मङ्गलबार पक्राउ गरेको हो ।

कोहलपुर नगरपालिका वडा नम्बर–११ एनटिभी रोडबाट पक्राउ परेका नक्कली डीएसपी नैनसिंह बिकले अन्य स्थानहरुमा पनि आफू डीएसपी भएको भन्दै ठगी गरेको प्रारम्भिक अनुसन्धानबाट खुल्न आएको ईलाका प्रहरी कोहलपुरले जनाएकोछ ।

पक्राउ परेका नक्कली प्रहरीका डिएसपीलाई नियन्त्रणमा लिई थप अनुसन्धान अघि बढाएको प्रहरीले बताएकोछ । 

प्रहरीका अनुसार नक्कली प्रहरीका डिएसपी बनेर अन्यत्र ठगि गरेको हुन सक्ने भन्दै आफू ठगिएको भए इलाका प्रहरी कार्यालयमा जानकारी तथा सम्र्पक गर्न आग्रह गरेकोछ ।