नेपालगन्ज २३ साउन : काठमाडौँबाट बैतडीका लागि उडेको अन्नपूर्ण एयरलाइन्सको हेलिकप्टर बाँकेमा आपत्कालीन अवतरण गरिएको छ । 

आज दिउँसो साढे ४ बजे बैतडीका लागि उडेको अन्नपूर्ण एयरलाइन्सको (नाइनएन एएनयू) उक्त हेलिकप्टरलाई मौसम खराबीका कारण राप्तीसोनारी गाउँपालिका वडा–१ को बगरमा आकस्मिक अवतरण गरिएको जिल्ला प्रहरी कार्यालय बाँकेका डीएसपी नारायण डाँगीले बताए ।

काठमाडौँबाट नेपालगन्ज लागि उडेको उक्त हेलिकप्टर नेपालगन्जपछि बैतडी जाने योजना रहेको थियो । प्रतिकुल मौसमका कारण आकस्मिक अवतरण गराइएको उक्त हेलिकप्टर अहिले नजिकैको सशस्त्र ब्यारेकमा राखिएकोछ ।

हेलिकप्टरमा पाइलटसहित तीनजना छन् । दुईजना पर्यटकलाई बोकेर हेलिकप्टर बैतडी जाँदै थियो ।