नेपालगन्ज २४ साउन : कोहलपुर नगरपालिका वडा नम्बर–१२ चप्परगौडी स्थित ज्ञानकुञ्ज इग्लिस बोर्डिङ स्कुलको ठक्करबाट एक जना युवाको मृत्यु भएकोछ भने १३ वटा खसीबाख्रा मरेकाछन् । 

बाँकेको राप्तीसोनारी गाउँपालिका वडा नम्बर–९ स्थित ढकेरी सडक खण्ड अन्तर्गत झिझिरी खोलाको ओरालोमा ज्ञानकुञ्ज इग्लिस बोर्डिङ स्कुलको बसले कुल्चिदाँ गोविन्द ओलीको घटनास्थलमै मृत्यु भएको हो । स्कुल बसले किच्दा ओलीसँगै १३ वटा खसीबाख्रा मरेका छन् । 

यो पनि पढ्नुहोस् ढकेरीमा स्कुल बसले कुल्चिदाँ एकजनाको मृत्यु, एक दर्जन खसीबाख्रा मरे

कोहलपुर नगरपालिका वडा नम्बर–१२, चप्परगौडीको ज्ञानकुञ्ज इग्लिस बोर्डिङ स्कुलको ना ४ ख ४५७० नम्बरको बसले सडकमा हिँडिरेका ओलीसहित खसीबाख्रालाई पछाडीबाट कुल्चदै अघि बढेको थियो ।

ज्ञानकुञ्ज स्कुलको उक्त बसले कोहलपुरको चप्परगौडीबाट ढकेरी बिद्यार्थी छाड्न गएको बेला ढकेरी पुग्नु अगावै झिझिरी खोलाको ओरालोमा ठक्कर दिएको जिल्ला प्रहरी कार्यालय बाँकेका प्रवक्ता एवम डिएसपी नारायण डाँगीले जानकारी दिए । 

बसले युवकसहित खसीबाख्रालाई ठक्कर दिएर केही पर पुगेपछि बस ड्राइभरले बस रोकेर भागेको डिएसपी डाँगीले बताए । उनका अनुसार बसमा सवार सबै विद्यार्थीहरु सकुसल रहेकाछन् । 

स्कुल बसको ठक्करबाट ओली र खसीबाख्राको मृत्यु भएपछि स्थानीयबासीले पूर्वपश्चिम राजमार्ग अवरुद्ध गरेका थिए । दुर्घटनामा मृत्यु भएका गोविन्द ओली राप्तीसोनारी गाउँपालिका वडा नम्बर–९ खैरीका स्थानीयबासी हुन् ।

डिएसपी डाँगीका अनुसार घटनाको अनुसन्धान अघि बढेकोछ । घटना स्थलबाट शव व्यवस्थापन गरि राजमार्ग खुला गर्ने कार्य भएको छ । भने ज्ञानकुञ्ज इग्लिस बोर्डिङ स्कुलसँग समन्वय गरेर ड्राइभरलाई सम्पर्कमा ल्याउने प्रयास अघि बढेकोछ ।