नेपालगन्ज २८ साउन: नेपालगन्ज उद्योग वाणिज्य संघका पूर्व अध्यक्ष अच्युत प्रसाद प्रसाईको निधन भएकोछ । 

स्वास्थ्यमा समस्या आई काठमाण्डौं स्थित मेडीसिटी अस्पतालमा उपचारत प्रसाईको सोमबार विहान ६९ वर्षको उमेरमा निधन भएको हो ।

उनको निधनसंगै नेपालगन्जले यस क्षेत्रका कुशल एवम सक्षम  व्यवसायीक, राजनीतिक, सामाजिक तथा आर्थिक धरोहर व्यक्ती गुमाएको छ।

रामेछाप जिल्लाको मन्थली नगरपालिका भटौलीमा बुवा हिरालाल प्रसाईं तथा आमा प्रेमकुमारी प्रसाईंको कोखबाट २०१२ साल असार २४ गते जन्मिएका प्रसाई विगत पाँच दशकदेखि नेपालगन्जलाई कर्मथलो बनाउदैँ आएका थिए । 

उनी यस क्षेत्रका व्यवसायीक, राजनीतिक, सामाजिक तथा आर्थिक धरोहर प्रजातान्त्रिक उद्योगी व्यवसायी संघ बाँकेको परिकल्पनाकार हुन् ।

नेपालगन्ज उद्योग बाणिज्य महासंघका पूर्व कार्यकारणी सदस्य समेत रहेका प्रसाई २०५३ पुष देखि २०५९ पुष सम्म नेपालगन्ज उद्योग वाणिज्य संघको अध्यक्षमा रहेर सफल र कुशल नेतृत्व गरिसकेका छन् । 

देश सशस्त्र द्वन्द्वमा रहेको बेला उद्योगीहरुको नेतृत्व गर्दै पश्चिम नेपालको समग्र उद्योगी, व्यवसायी, आर्थिक तथा समाजिक क्षेत्रको सफल नेतृत्व गरेका थिए । उनले समग्र नेपालगन्ज उद्योग बाणिज्य संघ, यहाँका उद्योगी, व्यापारि तथा सामाजिक क्षेत्रमा अनुसरणीय योगदान पु¥याएका थिए ।

बौद्धिक व्यक्तित्व प्रसाई उद्योग वाणिज्य संघको राजनीतिका क्षेत्रमा चर्चित नाम हो । संघमा मनोनित भएपछि उनी लगायतले संघको स्वामित्वमा रहेको जग्गा अतिक्रमण हटाउने काम गरेको थियो । यद्यपी त्यो प्रयास असफल भयो । संघका कर्मचारीको अवस्था बेहाल थियो । तलब अति कम भएपछि तलब बृद्धि गर्ने काम उनकै पालमा भएको थियो, त्यसबेला संघको भौतिक संरचना राम्रो थिएन ।

संघको बिधान पनि एक पन्ने थियो । त्यसलाई संशोधन गर्ने काम भयो । निर्वाचन गराउन दबाब दिइयो । २०५३ सालमा निर्वाचन भयो । तत्कालिन उपाध्यक्ष विजयमान पति र प्रसाईबीच प्रतिस्पर्धा भयो । १५ जना कार्यसमितिमा १२ जना प्रसाई पक्षका विजयी भए । निर्वाचन जिते पनि उनी सामु धेरै चुनौती थिए । ती चुनौती उनले क्रमशः पार गर्दै काम गरे ।

त्यसबेला उद्योगी, व्यवसायीहरुलाई हेर्ने प्रहरीको नजर गलत थियो । दुहुनो गाई बनाउने चलन थियो । त्यसलाई रोक्न उनले निकै ठुलो मेहेनत गर्नुपरेको थियो । भने एकातिर टोले गुण्डाहरुले सताउने काम त्यस्तै थियो । यी सबै कुरा क्रमशः उनले समाधान गरे । एउटा कोठाबाट सुरु भएको संघको कार्यालय तीन तले भवन निर्माण भयो । संघले बिधान पायो भने भौतिक संरचनामा सम्पन्न भयो ।

यसका साथै पहिलो पटक उनी नै नेपाल उद्योग वाणिज्य महासंघमा सहभागि भए । पहिलो पटक प्रसाई केन्द्रिय सदस्य भएपछि अहिलेसम्म त्यो कार्यले निरन्तरता पाएको छ । हरेक वर्ष नेपालगन्ज उद्योग वाणिज्य संघबाट केन्द्रमा प्रतिनिधित्व हुन्छ । उनकै कार्यकालमा माइन जर्मनी कार्यक्रम सञ्चालन भयो । ३ सय सदस्य रहेको संघलाई उनकै कार्यकालमा १८ सय सदस्यको धनी बनाइएको थियो ।

उनी नेपाली काँग्रेस बाँकेका पूर्व कोषाध्यक्ष समेत हुन् । सांग्रीला विकास बैंकका अध्यक्ष समेत रहेका उनी विभिन्न सामाजिक संघ संस्थामा नेतृत्वदायी भूमिकामा रहेर अतुलनिय योगदान दिएका थिए । 

समग्र व्यवसायीका अभिभावक अच्युत प्रसाद प्रसाईंको आज सोमबार विहान मेडीसिटी अस्पताल काठमाण्डौंमा उपचारका क्रममा निधन भएको हो । 

यसैबीच, नेपालगन्ज उद्योग वाणिज्य संघले सोमबार संघ परिसरमा शोक सभा आयोजना गरि अच्युतलाई स्मरण गरेको छ । सोक्रममा संघका पूर्वअध्यक्षहरु नन्दला वैश्य, कृष्णप्रसाद श्रेष्ठ, निर्वतमान अध्यक्ष अब्दूल वाहिद मन्सुरी तथा संघ अध्यक्ष टंकबहादुर धामीले स्वर्गीय अच्युतको योगदानमाथि चर्चा गर्दै उनले देखाएको पथमा हिँड्ने बताएका थिए । सोक्रममा नेपालगन्जका दुई दर्जन बढि उद्योगी व्यवसायीहरु उपस्थित रहेका थिए । प्रसाईको निधनमा संघले आफ्नो झण्डा आधा झुकाएकोछ ।