नेपालगन्ज २९ साउन : ज्ञानकुञ्ज इग्लिस बोर्डिङ स्कुलको बसको ठक्करबाट ज्यान गुमाएका स्थानीय गोविन्द ओलीको परिवारलाई क्षतिपूर्ति बापत साढे २१ लाख रुपैयाँ दिने सहमति भएको छ । 

कोहलपुर नगरपालिका वडा नम्बर–१२ चप्परगौडी स्थित ज्ञानकुञ्ज स्कुलको बसको ठक्करबाट गोविन्दसहित २१ वटा खसी बाख्राको मृत्यु भएको थियो ।

यो पनि पढ्नुहोस्  ढकेरी स्कुल बसको ठक्कर अपडेट: स्थानीय गोविन्द ओलीको मृत्यु, बस ड्राइभर फरार

स्कुल बसको ठक्करबाट बाख्रा चराउन गएका राप्तीसोनारी गाउँपालिका–९ खैरीका २६ वर्षीय गोविन्द ओलीको र २१ खसी÷बाख्राको गत साउन २४ गते मृत्यु भएको थियो ।  

राप्तीसोनारी गाउँपालिका वडा नम्बर–९ स्थित महेन्द्र राजमार्ग अन्तरगतको ढकेरी सडक खण्ड नजिक झिझिरी खोलाको ओरालोमा ज्ञानकुञ्ज इग्लिस बोर्डिङ स्कुलको ना ४ ख ४५७० नम्बरको बसले कुल्चिदाँ गोविन्द ओलीको घटनास्थलमै मृत्यु भएको थियो ।

मृतकका ओलीका लागि लागि १५ लाख र २१ खसी बाख्राको लागि जनही २५ हजारका दरले साढे २१ लाख क्षतिपूर्ति उपलब्ध गराउने सहमति भएको हो । स्कुल सञ्चालक समितिले उक्त रकम २५ दिनभित्र १५ लाख र बाँकी रकम बीमाको रकमसँगै उपलब्ध गराउने सहमति भएको छ ।

त्यस्तै, मृतकका नौ महिनाका छोरालाई जहाँ पढाए पनि कक्षा १२ सम्मको खर्च सोही विद्यालयले ब्यहोर्ने सहमति भएको छ ।

बाँकेका प्रहरी प्रवक्ता डिएसपी नारायण डाँगीका अनुसार कोहलपुर नगरपालिका–१३ का २५ वर्षीय बसका चालक प्रकाश सुनार प्रहरी नियन्त्रणमा छन् । दुर्घटनालगत्तै फरार सुनारलाई प्रहरीले दुई दिनपछि स्कुलको समन्वयमा नियन्त्रणमा लिएको थियो । 

प्रहरी हिरासतमा रहेका चालकले बसको ब्रेकले एक्कासी काम नगर्दा दुर्घटना भएको प्रहरीसमक्ष बयान गरेका छन् ।

‘त्यो घुम्तीमा उताबाट कार आइरहेको थियो र मैले एकाएक खसी÷बाख्रा र मानिसलाई सडक किनारमा देखेपछि बस नियन्त्रणमा लिने प्रयास स्वरूप ब्रेक हान्दा पनि ब्रेकले काम नगरेपछि नसोचेको दुर्घटना हुन पुग्यो,’ चालकको भनाइ उद्धृत गर्दै एक प्रहरी अधिकारीले भने ।

हाल चालक ईलाका प्रहरी कार्यालय कोहलपुरको हिरासतमा छन् । अदालतबाट पहिलो पटक म्याद थप भइसकेको हुँदा चालक सुनारसँग थप बयान अब अदालत आफैले लिने बाँके प्रहरीले जनाएकोछ ।

स्कुल बसको ठक्करबाट ओली र खसीबाख्राको मृत्यु भएपछि स्थानीयबासीले महेन्द्र राजमार्ग (पूर्वपश्चिम) अवरुद्ध गरेका थिए । भने बसमा रहेका विद्यार्थी सबै सकुसल थिए ।