नेपालगञ्ज औद्योगिक क्षेत्रका ३४ उद्योगमा आठ सयलाई रोजगारी

नेपालगन्ज ३१ साउन : नेपालगञ्ज औद्योगिक क्षेत्रमा रहेका उद्योग र प्रतिष्ठानमा आठ सयजनाले रोजगारी पाएका छन् । औद्योगिक क्षेत्रमा सञ्चालित ३४ उद्योगमा उनीहरुले रोजगारी पाएका हुन् ।

औद्योगिक क्षेत्र व्यवस्थापन कार्यालयका प्रमुख इञ्जिनियर प्रकाश केसीका अनुसार रोजगारी पाउनेमा ९५ प्रतिशत पुरुष छन् । विगतको तुलनामा हाल उत्पादनमा कमी भए पनि यहाँका सबै उद्योग सञ्चालनमा छन् । 

ती उद्योगमा विगतमा एक हजारभन्दा बढीले रोजगारी पाएका थिए । औद्योगिक क्षेत्रमा अधिकांश कामदार भारतीय नागरिक छन् । नेपालीलाई रोजगारीमा प्राथमिकता दिन माग गर्दै आए पनि आफूहरू सफल हुन नसकेको नेपाल ट्रेड युनियन महासंघका केन्द्रिय सदस्य पूर्ण केसीले बताए । 

औद्योगिक क्षेत्रमा मात्र नभई बाँकेका अधिकांश उद्योगमा महिला कामदारको संख्या न्यून छ । औद्योगिक क्षेत्रमा रहेको गणपति प्लास्टिक उद्योगकी सञ्चालिका दिला शाहले महिलामाथि सदियौंदेखि हुँदै आएको भेदभावको प्रभाव निजीक्षेत्रमा पनि परेको बताउछिन् ।

‘महिलाले के नै गर्न सक्छन् र, भन्ने सोँचमा अझैँ समाजमा छ । नेपालगन्ज औद्योगिक क्षेत्रमा मात्र होइन, देशभरको निजीक्षेत्रमा यस्तै समस्या छ,’ शाहले अगाडी भनिन्, ‘अब विस्तारै महिलाहरू शीपयुक्त भएर उद्योग क्षेत्रमा आइरहनुभएको छ ।’ राज्यले महिलालाई शीपयुक्त बनाउन सके निजीक्षेत्रले रोजगारी दिन कन्जुस्याइँ नगर्ने उनको भनाईछ । 

उद्योगबाट रोजगारी सृजना भएको संख्या धेरै देखिए पनि वास्तविकता भने फरक छ । थोरै मात्र नेपालीले रोजगारी पाउने गर्छन् । प्राविधिक शीपको अभाव देखाउँदै नेपालीले काम पाउँदैनन् । औद्योगिक क्षेत्रभित्रै दक्ष प्राविधिक जनशक्ति उत्पादन गर्ने भेरी प्राविधिक शिक्षालयसमेत सञ्चालनमा छ ।

विसं. २०३० मा २३३ रोपनीमा स्थापना भएको औद्योगिक क्षेत्रमा हाल एउटा उद्योग बन्द छ । पूर्ण क्षमतामा सञ्चालित औद्योगिक क्षेत्रमा तामा, पित्तल, काँस, आल्मुनियमका भाँडा, खाद्य सामग्री, विद्युतीय सामग्री, प्लाइउड, ढोका, ट्रान्सफर्मर र प्लास्टिकका भाँडा उत्पादन हुने गरेका छन् ।