नेपालगन्ज ८ भदौ :संघीय सरकारका पूर्वमन्त्री एवं एमाले बाँकेका नेता स्वर्गीय दिनेशचन्द्र यादवका छोरा भारतमा मृत फेला परेका छन् । 

यादवका माहिला छोरा धनन्जय यादवको शुक्रबार भारत श्राबस्ती स्थित राप्ती नदीको बगरमा शव फेला परेको हो ।

नेपाली नागरिकता परित्याग गरेर भारत श्राबस्तीको भिन्गा बजारमा बसोबास गर्दै आएका धनन्जयलाई यही भाद्र ५ गते अपहरण गरिएको थियो । अपहरणमा परेका धनन्जयको शव शुक्रबार मध्यान्ह भारत श्राबस्ती स्थित राप्ती नदीको तटमा फेला परेको एमाले लुम्बिनी प्रदेश परिषद सदस्य पदमबहादुर धितालले जानकारी दिए । 

उनले भारतीय स्थानीय निकायमा सरपञ्च पदमा निर्वाचित धनन्जयलाई भदौ ५ गते राती ८ बजे अज्ञात समुहले उनकै घरबाट अपहरण गरेर लगिएको धितालले बताए ।

धितालले सामाजिक सञ्जालमा अपहरणमा संलग्न अपराधीको पत्ता लगाई कडा काराबाही गर्न पनि माग गरेका छन् । भारतीय भूमिमा घटना भएको हुन सक्ने भन्दै बाँके प्रहरीले भने घटनाका बिषयमा जानकारी नभएको बताएकोछ ।