नेपालगन्ज २३ भदौ : बाँकेको राप्तीसोनारी गाउँपालिकामा रहेको एक महिला सहकारीले एकै वर्षमा करीब दुई करोडको खसीबोका बिक्री गरेको छ ।

राप्तीसोनारी गाउँपालिका वडा नम्बर–६ टेपरीस्थित नयाँ सिर्जनशील सामाजिक उद्यमी महिला सहकारी संस्थाले गत आर्थिक वर्ष २०८०-०८१ मा एक करोड ८१ लाख बढीको खसीबोका बिक्री गरेर आर्थिक कारोबार गरेको हो ।

गत आर्थिक वर्ष २०८०-०८१ मा एक करोड ८१ लाख ३ हजार ८०९ रुपैयाँ बराबरको खसीबोका बिक्रीवितरण भएको उक्त महिला सहकारी संस्थाका प्रबन्धक दिव्या गुरुङले बताईन ।

उनका अनुसार सो आर्थिक वर्षमा ३१ हजार ७१० किलोग्राम तौल बराबरका एक हजार १७ वटा खसीबोका बिक्री भएका थिए । जुन बिक्रीबाट एक करोड ८१ लाख ३ हजार ८०९ रुपैयाँ बराबरको आर्थिक कारोबार भएको हो । सोही आर्थिक वर्षमा एक हजार ३० किलोग्राम बराबरका ७३ वटा ब्याड बाख्रा पनि बिक्री भएको थियो । जसबाट तीन लाख ५५ हजार ३५० रुपैयाँ आम्दानी भएको थियो ।

त्यसैगरी आर्थिक वर्ष २०७९–०८० मा २५ हजार ३४० किलोग्राम बराबरका ९ सय २ वटा खसीबोक्रा बिक्री भएकोमा उक्त वर्ष खसीबोका बिक्रीबाट एक करोड ३० लाख ७५ हजार ७०८ रुपैयाँको कारोबार भएको थियो ।

उक्त सहकारीमा ५९ वटा समूह छन् । ती समूहका किसानहरुबाट खसीबोका तथा बाख्रा खरिद गरिदै आएकोछ । भने ऋणसमेत उपलब्ध गराइन्छ ।

चाडबाडका बेला खसीबोकाको माग बढी हुने र सोही समयमा नै वर्षभरीको कारोबार हुने गरेको प्रबन्ध गुरुङले बताइन् । हाल सहकारी आबद्ध किसानसँग ५ सय २५ रुपैयाँ प्रतिकिलोका दरले खसीबोका खरिद गर्ने र १० देखि १५ रुपैयाँ प्रतिकिलो बढाएर व्यापारीलाई बिक्री गर्ने गरिएकोछ ।

बाँकेको राप्तीसोनारी गाउँपालिका –६ टेपरी लगायतको क्षेत्र खसीबाख्रा पालनको पकेट क्षेत्रका रुपमा रहदै आएकोछ । सो क्षेत्रमा ब्यापारी र उपभोक्ता स्वयम किसानकै घर पुगेर खसीबाख्राको खरिद गर्ने गरेकाछन् ।