कोहलपुर २५ भदौ : बाँकेको कोहलपुर नगरपालिकामा दुई सहकारी संस्थामा तोडफोड गरी लाखौं रकम चोरी भएको छ ।

सोमबार राती करिब १२ः५८ मिनेटमा कोहलपुर सहकारी संस्थामा तोडफोड गरी लाखौं रकम चोरी भएको ईलाका प्रहरी कार्यालय कोहलपुरले जनाएको छ ।

कोहलपुर नगरपालिका–२ मा रहेका दुबै सहकारीमा एउटै उपाय अपनाएर चोरी भएको छ ।

वसन्त बचत तथा ऋण सहकारी संस्था र रझेना साना सहकारी संस्थाको सहकारी संस्थाको दक्षिण तर्फको ग्रिल भएको झ्यालमा ग्रिल निकाली भित्र पसेर चोरी भएको इप्रका कोहलपुरका प्रमुख (डिएसपी) धर्मराज भण्डारीले जानकारी दिए ।

भण्डारीका अनुसार वसन्त बचत तथा ऋण सहकारी संस्थाको कम्प्यूटरको हार्डडिक्स चोरी भएको छ, भने रझेना साना सहकारी संस्थाको करिब ३ लाख बढी नगद चोरी भएको छ ।

रझेना साना सहकारी संस्थाका अध्यक्ष चन्द्रकला लामिछानेले ३ लाख ६५ हजार ९ सय ३५ रुपैया रकम चोरी भएको बताए ।

सहकारीको झ्यालमा ग्रिल निकाली चोर भित्र पसेको लामिछाने बताउँदै सेफ (भल्ट) मा राखेको पैसा समेत फुटाली पैसा चोरी भएको बताईन । दुवै सहकारी ५० मिटर वरपर छन् ।

यि दुवै सहकारीबाट गत वर्ष कार्तिक २० गते पनि चोरी भएको प्रहरीको रेकर्डमा रहेको इलाका कोहलपुरले जानकारी दिएको छ ।