नेपालगन्ज २६ भदौ : सरकारले नेपाली काँग्रेसकी केन्द्रिय सदस्य एवम पूर्वउपसभामुख चित्रलेखा यादवलाई अस्ट्रेलियाको राजदूतमा सिफारिस गरेको छ । सोमबार राति बसेको मन्त्रिपरिषद् बैठकले मन्त्रीस्तरीय सुविधा पाउनेगरी यादवलाई अस्ट्रेलियाको राजदूत सिफारिस गर्ने निर्णय गरेको हो ।

अब यादवको नाम प्रस्तावित राजदूतको रूपमा संसदीय सुनुवाइ समितिमा जानेछ । समितिले अनुमोदन गरेमा उनी अस्ट्रेलियाको लागि नेपाली राजदूत बन्नेछिन् । मन्त्रिपरिषद् बैठकले १६ साउनमा १८ देशका लागि राजदूत सिफारिस गर्दा समावेशी नभएपछि सरकार आलोचित बनेको थियो । राजदूत सिफारिस गर्दा समावेशीता लागु गर्न नसकिएको प्रति संसदीय समितिमा उपस्थित भएर परराष्ट्र मन्त्री आरजु राणाले माफीसमेत मागेकी थिइन् ।

सरकारले राजदूत सिफारिस गर्दा दलित, मधेशी, मुस्लिम समुदायबाट परेका थिएनन् । मधेशी मूलबाट राजदूत नगराएको प्रति उठेको चासो सम्बोधन हुने गरी सरकारले यादवको नाम सिफारिस ग¥यो ।

सत्ता गठबन्धनमा भागबण्डा हुँदा अस्ट्रेलियाको राजदूत नेपाली काँग्रेसको भागमा परेको थियो । यसअघि अस्ट्रेलियाको राजदूतमा कान्ता रिजालको नाम सिफारिस भएको थियो । तर, अन्तिममा रिजालको नाम फिर्ता भएको थियो । अहिले सोही ठाउँमा यादवको नाम सिफारिस गरिएको हो । 

पार्टी सभापति शेर बहादुर देउवानिकट मानिएकी नेतृ यादव यसअघि शिक्षामन्त्री भइसकेकी छिन् । उनी पार्टीको कोषाध्यक्षको जिम्मेवारी पनि सम्हालिसकेकी छिन् । २०७९ को निर्वाचनमा भने उनी जसपा, नेपालका राजकिशोर यादवसँग पराजित भएकी थिईन् ।

सिराहामा जन्मिएकी उनी सुशील कोइराला प्रधानमन्त्री भएको बेला शिक्षामन्त्री भएकी थिइन । मधेस प्रदेशको भुगोलको महिला तर्फबाट केन्द्रिय सदस्यमा निर्वाचित भएकी उनले गीता यादवलाई पराजित गरेकी थिइन । संसदीय दलको प्रमुख सचेतक भइसकेकी उनलाई परराष्ट्रमन्त्री डाक्टर आरजु राणा देउवाले राजदूतका लागि नाम सिफारिस गरेकी थिइन ।

लोकतान्त्रिक आन्दोलन र काँग्रेसको संगठन निर्माणमा लामो अनुभव संगालेकी उनले ६२–०६३ को जनआन्दोलनका क्रममा विघटति प्रतिनिधिसभाको सडकमा अधिवेशन चल्दा तत्कालिन उपसभामुख उनले सडकमै अधिवेशन चलाएकी थिइन् ।

तत्कालिन सभामुख तारानाथ रानाभाटले सो आन्दोलनलाई समर्थन नगरेकाले सडक संसदको सभामुख यादव भएकी थिइन् । जनआन्दोलनपछि संसद पुनःस्थापित भयो । तर, सभामुख भने यादव हुन पाइनन् । सभामुख तत्कालिन एमाले नेता सुवास नेम्वाङ सभामुख बनेका थिए । तत्कालीन समयमा यादवले आफूले साउथ एसियामै पहिलो सभामुख हुने अवसर गुमाउँदा निकै रोएको प्रतिक्रिया दिएकी थिइन ।

आन्दोलनपछि पुनर्स्थापित ऐतिहासिक प्रतिनिधिसभाको पहिलो बैठकको अध्यक्षता यादवले गरेकी थिइन् । ११ वैशाख ०६३ मा राजतन्त्रले घुँडा टेकेसँगै प्रतिनिधिसभा पुनर्स्थापना भएको थियो । आन्दोलनका बेला राजालाई साथ दिएका तत्कालीन सभामुख रानाभाटले १३ वैशाखमा राजीनामा दिए, त्यही दिन सुरु भएको संसद्को अध्यक्षता तत्कालीन उपसभामुख यादवले गरेको थिइन् ।

काँग्रेसको उच्च तहमा बसेर राजनीति गरेकी यादवलाई राजदूत बनाएर पठाएपछि उनको सक्रिय राजनीतिक करिअर अब के हुन्छ भन्ने जिज्ञासा उठेको छ । यादव आफैंले भने राजदूतको भूमिका निभाइसकेपछि पनि आफू सक्रिय राजनीतिमै रहने दाबी गरिन् ।

सिरहाबाट २०३६ सालदेखि काँग्रेसको राजनीतिमा संलग्न ५९ वर्षीया यादव सभापति शेरबहादुर देउवा पक्षीय हुन् । नेविसंघको त्रिभुवन विश्वविद्यायलयको कोषाध्यक्ष हुँदै उनी पार्टी राजनीतिमा प्रवेश गरेकी थिइन् । काँग्रेसकोे १४ औं महाधिवेशनमा मधेशबाट महिलातर्फको केन्द्रिय सदस्यमा निर्वाचित भएकी थिइन् ।