नेपालगन्ज २७ भदौ : बाँकेको खजुरामा युवाहरु लागु औषधको कुलतमा र बयस्कहरु घरेलु औषध(घरेलु मदिरा) को लतमा फंसेको स्थानीय अगुवाहरुले बताएका छन् । 

इलाका प्रहरी कार्यालय धनौलीमा नयाँ सरुवा भएर गएका ईन्चार्ज प्रहरी निरीक्षक पुर्ण केसीको परिचयात्मक कार्यक्रममा बोलाईएका स्थानीय अगुवाहरुले युवाहरुमा लागु औषध सेवनको समस्या विकरालरुपमा आएको बताए ।

उनीहरुले भारतीय सिमावर्ती क्षेत्र र बाँके बर्दियाको सिमामा बढी लागु औषधको कारोबार र सेवन हुने गरेको बताउँदै प्रहरीको सक्रियता बढाउन आग्रह गरे । 

सहभागी वक्ताहरुले खजुरामा गौहत्या र घरेलु मदिराको पनि बिगबिगी रहेको उल्लेख गर्दै प्रहरीले गैरकानुनी कार्य नियन्त्रण गर्न सक्रियतापूर्वक लाग्नु पर्ने बताए । 

तिब्ररुपमा शहरिकरण भइरहेको खजुरा क्षेत्रमा ट्राफीक ब्यवस्थापन, घरेलु हिँसा, बालबिबाह, मावबेचबिखन जस्ता घटनाहरु पनि हुने गरेको बताउँदै उनीहरुले प्रहरीले सबै खाले अपराधहरुलाई शून्य सहनशीलताका साथ न्यूनिकरण गर्न सुझाव दिए । वर्षाकाबीच उपस्थित स्थानीय अगुवाहरुले अपराध र अपराध कर्ममा लागेकाहरुलाई राजनीतिक दलहरुले संरक्षण गर्ने गरेको आरोप लगाउँदै अपराध कुनै दल विषेशको नहुने बताए ।

कार्यक्रममा बोल्दै खजुरा गाउँपालिकाका अध्यक्ष डम्बर विक तुफानले अपराध न्यूनिकरणका लागि प्रहरी र स्थानीयतहबीच समन्वय हुन जरुरी रहेको औंल्याए । उनले स्थानीयतहसँग आफ्नो प्रहरी नभएका कारण प्रहरी बिना स्थानीयतहले चाहेरमात्र सुशासन कायम हुन नसक्ने बताए । स्थानीयतहबाट प्रहरीलाई कानून बमोजिम काम गर्न पूर्ण साथ रहने बताउँदै अध्यक्ष विकले प्रहरीले पनि स्थानीय तहलाई सुशासन कायम गराउन साथ दिनु पर्ने बताए ।

गाउँपालिकाकी उपाध्यक्ष मञ्जु मल्लले खजुरामा गुणगर्दी र चोरी पनि थप समस्याका रुपमा रहेको बताईन् । उनले स्थानीयतहसँग पनि संबिधान बमोजिमको न्यायिक निकाय रहेकाले कानूनले स्थानीयतहको अधिकार क्षेत्रमा राखेको न्याय निरुपणका मुद्दाहरु प्रहरीले स्थानीयतहलाई पठाउन सुझाव दिईन । कानून कार्यान्वयनमा प्रहरी र स्थानीय तह मिलेर अगाडी बढेमात्र नागरिकले शान्तिको अनुभूति गर्न पाउने उनले बताईन् ।

प्रहरी निरक्षिक केसीले समाजले उठाएको विषयलाई कारवाही गर्न र अपराध न्युनिकरण गर्न आफु प्रतिबद्ध रहेको बताए ।

कार्यक्रममा काँग्रेस खजुराका सभापति रमेश सिंजाली, एमालेका पालिका अध्यक्ष देबीलाल खनाल, माओवादी केन्द्रका अध्यक्ष राजकुमार बिक, राजमोकी मोमीना खातुन शिक्षक ऋषिराम सापकोटालगायतले प्रहरीलाई अपराध नियन्त्रण गर्न दलका तर्फबाट सहयोग रहने प्रतिबद्धता जनाएका थिए । कार्यक्रममा ख श्रेणीमा रहेको खजुराको ईलाका प्रहरी कार्यालयलाई क श्रेणीमा स्तरउन्नती गर्न सहभागीको माग थियो ।