नेपालगन्ज ११ असोज : बर्दियाको मधुवन नगरपालिका–८ हाटबजार स्थित कोठारी थारुको घरको कोठामा बुधबार पेस्तोल फेला परेको छ । थारुको घरमा भारतीय नागरिक भाडामा बस्दै आएको कोठामा पेस्तोल फेला परेको हो ।

जिल्ला बहराईच मोतिपुर थाना उर्लाबजार उत्तर प्रदेश भारत घर बताउने सरोवर राईन नाम गरेका व्यक्ति गत बैशाख देखि थारुको घरमा कोठा भाडामा लिई बस्दै आएका थिए । गत भदौ २० गते कसैलाई जानकारी नगराई ती भारतीय नागरिक घरको कोठा छोडी गएका थिए ।

घरबेटी थारुले बुधबार कोठा सरसफाइ गर्ने क्रममा टियुसिएसओएन लेखिएको सेतो फाईबरको झोलामा राखिएको अवस्थामा होम मेड पेस्तोल फेला परेको हो । कोठामा पेस्तोल फेला परे लगत्तै घरबेटीले प्रहरीलाई खबर गरेका थिए ।

कोठामा फेला परेको पेस्तोल प्रहरीले बरामद गरी भारतीय नागरिक सरोवर राईनको खोजतलास गरिरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।