नेपालगन्ज १३ असोज : सामान्य अवस्थामा काठमाण्डौं–विराटनगरको एकतर्फी हवाई भाडा हो –५७०० रुपैयाँ । तर, वायुसेवा कम्पनीहरुले अहिले ९९०० रुपैयाँ भाडा उठाइहेकाछन्। सबै हवाई सेवा कम्पनीले बाढीपहिरोबाट सडकमार्ग अवरुद्ध भएपछि भाडा दोब्बर भन्दा बढी लिएकाछन् । 

शुक्रबार बिहानदेखि अविरल परेको पानीका कारण जताजतै बाढीपहिरोले काठमाडौं जोड्ने सबै स्थलमार्ग बन्द छन् ।  यस्तो मानवीय संकटका बेलामा वायुसेवा कम्पनीहरुले न्यूनतम भाडामा उडान गर्नुपर्नेमा उल्टै उपभोक्ता ‘लुट्ने’ माध्यम बनाएका छन् । 

यसरी भाडा बृद्धि काठमाण्डौं– विराटनगरको मात्र होइन, सबैतिरको बढाइएकोछ । दशैं बिदा सुरु भएपछिका लागि खुलेको हवाई टिकटमा पनि भाडा यो स्तरको महँगो छैन, जस्तो अहिले मानवीय संकटका बेला पु¥याइएकोछ । 

काठमाण्डौंबाट बाहिरिन अहिले हवाई मार्गबाहके अर्को उपाय छैन । यही संकटको फाईदा उठाउँदै कम्पनीहरुले मनलाग्दी भाडा बढाएर अमानवीय व्यवहार प्रकट गरेका हुन् । 

विपद्मा हवाई भाडा महँगो बनाएको भन्दै नागरिक उड्डयन प्राधिकरणले आन्तरिक उडान गर्दै आएका वायुसेवा कम्पनीलाई डाकेकोछ । 

प्राधिकरणले वायुसेवा कम्पनीको छाता संगठन वायुसेवा सञ्चालक संघसँग सदस्य रहेका सबै वायुसेवा कम्पनीलाई आकस्मिक बैठक बोलाएको नागरिक उड्डयन प्राधिकरणका एक कर्मचारीले बताए । 

‘अहिले काठमाण्डौंबाट बाहिरिने र काठमाण्डौं भित्रिने अधिकांश सडकमार्ग बाढी र पहिरोका कारण पूर्णरुपमा प्रभावित छ । यही मौकाको फाइदा उठाउँदै अस्वाभाविक भाडा लिन थालेको पाइएकोछ’ ती कर्मचारले भने‘विपतको समयमा कम्पनीले संस्थागत सामाजिक उत्तरदायित्व समेत भुलेर भाडा राख्नु गलत हो । हामीले यसमा हस्तक्षेप गर्नेछौं ।’ -बिजमाण्डूबाट