नेपालगन्ज २० असोज : बाँकेको कोहलपुर नगरपालिकाले डुडुवा र रोहिनी खोलाको दोभानमा अत्याधुनिक शवदाह गृह निर्माण गर्ने भएको छ । कोहलपुर नगरपालिका–११ स्थित उक्त स्थानमा बन्न लागेको शवदाह गृहको आज शिलान्यास गरिएको छ ।

मानिसको मृत्युपश्चात गरिने अन्तिम क्रिया दाहसंस्कारलाई व्यवस्थापन गर्न डुडुवा गाउँपालिका वडा नम्बर–५, राप्ती नदीको सिधनिया घाटमा गाउँ कार्यपालिकाले ‘वैकुण्ठधाम’ निर्माण गरिरहेकै बेला कोहलपुर नगरपालिकाले समेत शवदाह गृह बनाउन थालेको हो । 

दाहसंस्कार गर्ने स्थान व्यवस्थित र सहज नभएपछि मानिसको मृत्युपश्चात गरिने अन्तिम संस्कार गर्न अप्ठेरो हुने गरेको थियो । यसले अब कोहलपुर क्षेत्रका नागरिकलाई गुमाएका आफन्तको अन्तिमक्रिया गर्न सहज र सरल हुने भएकोछ ।

यो पनि पढ्नुहोस् डुडुवा गाउँपालिकाले निर्माण गर्दै छ ४० लाखमा ‘वैकुण्ठधाम’

कोहलपुर नगरपालिकाका प्रमुख पूर्ण प्रसाद आचार्य, नगर उपप्रमुख संगिता सुवेदी, वडा अध्यक्ष कल्पना शर्मा अधिकारी, शवदाह गृह निर्माण समितिका संयोजक चक्र अधिकारीले शवदाह गृहको संयुक्तरुपमा शिलान्यास गरे । 

नगर प्रमुख आचार्यले शवदाह निर्माण भएपछि करिब ४२ किलोमिटर टाढा अगैया घाटसम्मको झन्झटिलो, कष्टकर र खर्चिलो अवस्थाको अन्त्य हुने बताए । ‘कोहलपुरमा शवदाह गृह नहुँदा शव अन्त्यष्टिका लागि राप्तीसोनारीको अगैया र बबई समेत लग्नुपर्ने बाध्यात्मक परिस्थिति थियो,’ उनले भने–‘अब त्यो अवस्था रहँदैन ।’

प्रारम्भिकरुपमा करिब एक करोड २५ लाख माथिको बजेटबाट निर्माण सम्पन्न हुने गरी काम अगाडि बढाइएको उनले बताए । 

नगर उपप्रमुख सुवेदीले गरीव तथा विपन्न परिवारमा कसैको मृत्यु हुँदा शव अन्त्यष्टि गर्न लैजान नै महंगो पर्ने अवस्थाको कोहलपुर शवदाह गृहले अन्त्य गर्ने बताइन् । 

नेपाली काँग्रेस बाँकेका सभापति नारायण प्रसाद गौडेलले नगरबासीको चाहना र आवश्यकतालाई बुझ्दै नगर प्रमुख आचार्य नेतृत्वको टिमले कोहलपुरमा शवदाह गृह निर्माणको काम प्रारम्भ गरेकोमा खुसी व्यक्त गरे । 

तीन महिनाभित्र निर्माण सम्पन्न गर्ने गरी कोहलपुर शवदाह गृहको शिलान्यास गरिएको शवदाह गृह निर्माण समितिक संयोजक अधिकारीले जानकारी दिए । शवदाह गृहमा काठ र मेसिनबाट शव जलाउन मिल्ने व्यवस्था मिलाइनेछ । त्यहाँ मलामीहरु बस्नका लागि संरचना बनाइने छ भने शौचालयको पनि व्यवस्थापन गरिनेछ । 

अधिकारीका कोहलपुर शवदाह गृह निर्माणका लागि ग्लोवल बैंकले ५० लाख रुपैयाँ सहयोग गरिसकेको छ भने एभरेष्ट बैंक र गोल्छा ग्रुपले पनि सहयोगको प्रतिबद्धता जनाइसकेको छ । पछिल्लो पटक विश्वब्यापी महामारी बनेको कोरोनाकालमा कोभिडबाट ज्यान गुमाउनेहरुको शवदाह गर्नेक्रममा ब्यवस्थित र पक्की घाट निर्माणको बहस चुलिएको थियो । 

उक्त बहस चुलिएपछि मानिसको मृत्युपछि समशान घाटमा गरिने अन्तिम संस्कार व्यवास्थापन गर्नका लागि उच्च अदालत तुलसीपुर, नेपालगन्जले २०७८ भदौमा बाँके र बर्दिया जिल्लाका सबै पालिकाहरुलाई ‘घाट’ व्यवस्थापनका अन्तरिम आदेश दिएको थियो ।

त्यसैलाई मध्यनजर गर्दै बाँकेको डुडुवा गाउँपालिका र कोहलपुर नगरपालिकाले छुट्टा छुट्टै दाहसंस्कार गर्ने स्थानको व्यवस्थापनमा लागेका छन् ।