नेपालगन्ज १४ कार्तिक : बाँकेको कोहलपुरमा प्लाष्टिकजन्य फुलगुच्छा तथा माला प्रयोगमा निषेध गरेकोछ । तर कोहलपुरदेखि १६ किलोमिटर दक्षिण नेपालगन्ज सहरमा भने प्लाष्टिकजन्य फूलगुच्छा तथा माला निर्वाधरपमा विक्रि भइरहेकाछन् ।

यो पनि पढ्नुहोस् कोहलपुरमा प्लाष्टिकजन्य फुलगुच्छा तथा माला प्रयोग निषेध

नेपालीहरुको चाडपर्व लक्षित गर्दै यहाँका ब्यापारीले हरेक वर्ष प्लाष्टिकजन्य फुलगुच्छा तथा माला आयात, विक्री वितरण गरिरहेकाछन् तर, स्थानीय सरकार भने कानमा तेल हालेर मौनता साँधिरहेकोछ । 

जिल्लाका अन्य पालिकाले प्लाष्टिकजन्य फूलगुच्छा र मालामा प्रतिबन्ध गर्दै अटेरी गर्नेलाई कारबाही गर्ने जनाउदासम्म नेपालगन्ज उपमहानगरपालिकाले भने वातावरणी तथा मानव स्वास्थ्यलाई दीर्घकालिन असर गर्ने प्लाष्टिकजन्य फूलगुच्छा र मालाको विक्री वितरणमा प्रतिबन्ध लगाउन कुनै सुरसार गरेको छैन ।

बाँकेको कोहलपुर नगरपालिकाले गत हप्ता एक सूचना जारी गर्दै तिहारलाई लक्षित गरी प्लाष्टिकका फूल र मालामा प्रतिबन्ध लगायो । तर, यता नेपालगन्ज उपमहानगरपालिकामा भने प्लाष्टिकका फूलमाला बजारभरी छ्यापछ्याप्ती विक्री भइरहेकोछ । जसका कारण स्थानीय फूल व्यवसायीहरू चिन्तित छन् । 

सप्तरंगी टीकाजस्तै तिहारमा फूलको पनि विशेष महत्व हुन्छ । दिदीबहिनीहरूले सप्तरंगी टीका लगाएपछि दाई वा भाइहरूलाई फूलमाला लगाउने गर्छन् । त्यसैले बजारमा फूलको माग उच्च हुन्छ ।

तिहारकै लागि भनेर वर्षेनी सर्वसाधारणहरू गाउँमा होस् या शहरमा फूल रोप्ने गर्छन् । नेपालगन्ज र आसपासका किसानले आर्थिक उपार्जनका लागि फूल खेती गर्छन् तर, प्लाष्टिकजन्य फूलमालाले प्राकृतिक फूल ओझेलमा पर्ने गरेको छ । यो क्रम यस वर्ष झन् बढेर आएकोछ ।

यो पनि पढ्नुहोस् नेपालगन्ज प्लाष्टिकका रंगिबिरंगी मालाले झकिझकाउ

विशेषगरि नेपालगन्जस्थित बागेश्वरी मन्दिर छेउमा रहेका पसलहरु, सदरलाईन, एकलैनी, पुरानो सिनेमा हल रोड, घरबारीटोल, न्यूरोड र धम्बोझी लगायतका स्थानमा यतिबेला रंगिबिरंगी प्लाष्टिकका फूलमालाले झकिझकाउ बनेका छन् । तर, ती माला फुलबाट बनेका भने होईनन् । 

रेशम, प्लाष्टिक र रगिंन कपडाबाट बनाइएका प्लाष्टिकका मालाले झकिझकाउ पारिएको छ । यसरी बिक्रीका लागि राखिएका प्लाष्टिकका फुल गुच्छाहरु स्वदेशी उत्पादन भने होईनन् । बजारमा उपलब्ध सबै माला भारतबाट आयात गरिएका माला भएको स्थानीय व्यापारि बताउँछन् । यसवर्ष बजारमा भारतबाट आयातित प्लाष्टिकका मालाहरुको दबदबा रहेको व्यापारी स्वयमले स्वीकारेकाछन् ।

सरकारले २०७८ असोज १९ गते प्लाष्टिक झोलामा प्रतिबन्ध लगाएको थियो भने माघ १७ गतेको मन्त्रिपरिषद्को बैठकबाट प्लाष्टिक झोला प्रतिबन्धसम्बन्धी कार्ययोजना स्वीकृत भई कार्यान्वयनमा आएको थियो । जसअनुसार वातावरणमा प्रतिकूल असर गर्ने ४० माइक्रोनभन्दा पातलो प्लाष्टिक झोला उत्पादन र प्रयोग गर्न पाइँदैन ।

यस्तै वातावरण विभागले २०७९ भदौ १० गते एक सूचना जारी गर्दै सोही महिनाको १ गतेदेखि प्लाष्टिकजन्य फुलगुच्छा, माला, झोलाको उत्पादन, प्रयोग तथा विक्रीमा प्रतिबन्ध लगाएपनि त्यसको प्रभावकारी कार्यान्वयन नभएको नेपालगन्जमा प्रष्ट देख्न पाइन्छ ।

सरकारले लगाएको प्रतिबन्धका अनुसार चाडबाड, महोत्सव तथा सभा समारोह लगायतमा प्लाष्टिकजन्य फुलगुच्छा, माला लगायतका सामाग्रीहरुको प्रयोग, उत्पादन, आयात, विक्रिवितरण र भण्डारण नगर्न नगराउन तथा यस्तो गरेको पाइएमा कानूनी कारबाही गरिनेछ । तर, नेपालगन्जको हकमा भने त्यो लागु भएको पाइदैन ।

यसरी प्लाष्टिकजन्य मालाले वातावारणीय प्रदुषण हुनुका साथै मानव स्वास्थ्यमा समेत प्रतिकुल असर पार्ने, स्थानीय कृषकबाट उत्पादित फुलले बजार नपाउने तथा ठूलो धनराशी बाहिरीने जस्ता समस्याहरु बढ्ने गर्छ । भने स्थानीय कृषकहरुले उत्पादन गरेको फुलहरुको उत्पादन र बजारीकरणमा प्रभाव पार्छ ।