नेपालगन्ज २४ कार्तिक : सुर्खेत–दैलेख सडक खण्ड अन्तर्गत शुक्रवार भएको फोर्स गाडी दुर्घटनामा परी मृत्यु भएकाका आफन्त आन्दोलित भएका छन् । प्रहरीको लापरबाहीका कारण गाडी दुर्घटना भएको भन्दै सुर्खेतमा आन्दोलन सुरु भएको छ । 

शुक्रबार दैलेखमा दुर्घटना भएको गाडी १५ सिटे भएको र सो गाडीमा ३४ जना यात्रु राख्दा दुर्घटना भएको भन्दै पीडित पक्षले आन्दोलन सुरु गरेका हुन् ।

यो पनि पढ्नुहोस् सुर्खेत बस दुर्घटना : ४ जनाको मृत्यु, ३० घाइते

उनीहरुले दैलेखका प्रहरी चेक पोष्टका कर्मचारीहरुलाई कारबाही गर्नुपर्ने, मृतकका परिवारलाई उचित क्षतिपूर्ति दिनुपर्ने, घाइतेहरुको शीघ्र स्वास्थ्य उपचारको व्यवस्था गरिनुपर्ने लगायतका माग राखेका छन् ।   

शुक्रबार दिउँसो सुर्खेतको वीरेन्द्रनगर नगरपालिका–१४ रातानाङ्लामा भएको फोर्स गाडी दुर्घटनामा चार जनाको मृत्यु भएको थियो भने ३० जना घाइते भएका थिए । सो ठाउँ दैलेख–सुर्खेत सिमाना नजिक पर्दछ । दैलेखबाट सुर्खेत आउँदै गरेको ०२००ख०९९८ नम्बरको फोर्स गाडी दुर्घटना भएको थियो ।

उनै मृतकका आफन्त शनिवार कर्णाली प्रदेशको राजधानी वीरेन्द्रनगरमा आन्दोलित भएका हुन् । एरीचौकबाट मंगलगढी चौकसम्म विभिन्न मागहरू राखेर प्रदर्शन गरेका छन् । 

दुर्घटनामा परी दैलेखको भैरवी गाउँपालिका–५ का गाडी चालक ३८ वर्षीय सुरेश केसी, भैरवी गाउँपालिका–२ का ३६ वर्षीय कर्णबहादुर विष्ट, भैरवी गाउँपालिका–२ का १६ वर्षीय दीपिका महतारा र २१ वर्षीय संगीता विष्टको मृत्यु भएको थियो । 

दुर्घटनामा ३० जना घाइतेमध्ये ३ जनाको अवस्था गम्भीर रहेको जिल्ला ट्राफिक प्रहरी कार्यालय सुर्खेतले जनाएको छ । ३० जनामा १६ जना महिला र १४ जना घाइते भएका थिए । घाइतेहरू सबैको प्रदेश अस्पताल सुर्खेतमा उपचार भइरहेको छ । क्षमताभन्दा बढी यात्रु राखेर चलाउँदा गाडीले नियन्त्रण गुमाएर दुर्घटना भएको प्रहरीले जनाएको छ ।