नेपालगन्ज २६ कार्तिक : बागलुङको जैमिनी नगरपालिका–७, जैदीको व्यार्थलानजिकै आज बिहान ‘पिकअप भ्यान’ दुर्घटना हुँदा पाँचजनाको मृत्यु भएको छ। 

जैमिनी नगरपालिका–८, छिस्तीबाट जिल्ला सदरमुकाम बागलुङ बजार जाँदै गरेको ग २ च ९२४७ नम्बरको भ्यान सोमबार बिहान जैमिनी–७ जैदीको व्यार्थला नजिकै हर्देवा भन्ने स्थानमा दुर्घटना हुँदा चालकसहित पाँचजनाको मृत्यु भएको हो।

मृतकहरूको पहिचान खुलिनसकेको जिल्ला प्रहरी कार्यालयका प्रहरी निरीक्षक एवं सूचना अधिकारी केशव थापाले बताए ।

जिल्ला ट्राफिक प्रहरी प्रमुख प्रहरी नायब निरीक्षक सुमन निउरेका अनुसार ६ जना सवार भ्यानमा एक जनाको गम्भीर घाइते अवस्थामा उद्धार गरिएको छ । उनलाई थप उपचारका लागि धौलागिरि अस्पताल, बागलुङ लगिएको छ । 

भ्यान सडकबाट करिब ४ सय मिटर तल खसेको छ । घटनाको थप विवरण आउन बाँकी रहेको थापाले बताए ।