नेपालगन्ज २६ कार्तिक : नेपालगन्जमा जारी बैकुण्ठधाम आध्यात्मिक महोत्सवमा दान गर्ने दाताहरुले ११ हजार दान गरेर बैकुण्ठधाम सिधनियाघाटको शिलालेखमा नाम लेखाउन सक्ने भएकाछन् ।

यो पनि पढ्नुहोस् बैकुण्ठधाम आध्यात्मिक महोत्सव : कथा वाचनको तेस्रो दिन दाताले गरे ३० लाख दान

यसअघि महोत्सवको आयोजकले २५ हजारदेखि माथिको रकम दान गर्ने दाताको नाम शिलालेखमा लेखिने निर्णय गरेपनि त्यसलाई संशोधन गरेर ११ हजारमाथि दान गर्ने दाताको नाम शिलालेखमा लेख्ने निर्णय भएको हो । 

बैकुण्ठधाम सचिवालयको आईतबार बसेको बैठकको निर्णय अनुसार शिलालेखमा नाम लेखाउन ११ हजार निर्धारण गरिएको बैकुण्ठधाम सिधनियाघाटका महासचिव श्रीराम सिग्देलले जानकारी दिए ।

बैकुण्ठधाम निर्माणमा धेरै भन्दा धेरै जनसभागिता जुटाउन शिलालेखमा दर्ज हुने दानको परीमाण घटाएको उनले बताए । उनले यसअघि ११ हजार भन्दा कम दान दिने दाताहरुले पनि रकम थपेर शिलालेखमा नाम लेखाउन सक्ने जानकारी दिए । 

यो पनि पढ्नुहोस् बैकुण्ठधाम आध्यात्मिक महोत्सव : दोस्रो दिन ३२ लाख बढी दान, भक्तहरुको बढ्यो घुँइचो

बाँके र यस आसपासमा व्यवस्थित दाहसंस्कार स्थल नहुँदा आफन्तको मृत्यु भएर शोकमा परेका स्थानीयबासीले भोग्दै आएको समस्यालाई मध्यनजर गर्दै राप्ती तटको सिधनियाघाटमा अत्याधुनिक दाहसंस्कार स्थल (बैकुण्ठधाम) निर्माण गर्ने उद्देश्यले हाल नेपालगन्जमा बैकुण्ठधाम आध्यात्मिक महोत्सव जारी रहेको छ ।

वाचन शिरोमणी पण्डीत दीनबन्धु पोखरेलको प्रमुख वाचनमा जारी महायज्ञमा हाल सम्म एक करोड बढी दान संकलन भइसकेको आर्थिक संयोजक कृष्णप्रसाद श्रेष्ठले जानकारी दिए ।  

यो पनि पढ्नुहोस्  बैकुण्ठधाम आध्यात्मिक महोत्सवः पहिलो दिन ८ लाख आर्थिक संकलन

आध्यात्मिक महोत्सव कार्तिक ३० गतेसम्म सञ्चालन हुनेछ । महोत्सव सञ्चालनका क्रममा हरेक दिन दाताहरुबाट प्राप्त भएको दानलाई सार्वजनिक गरिने मुल समितिका कोषाध्यक्ष श्रेष्ठले बताए । उनले बैकुण्ठधाम निर्माणका लागि दान गर्न चाहनेहरुका लागि महोत्सवस्थलमा क्युआर, नगदी रसिद र बैंक खाता उपलब्ध गराइएको बताए ।

महोत्सव अवधिको हरेक दिन बिहान ५ बजेदेखि ६ः३० बजेसम्म योगा, ८ बजेबाट १० बजेसम्म पूजाअर्चना र पाठपारायण, १ बजेदेखि झाँकीसहित सङ्गीतमय भागवत कथा प्रवचन, त्यसलगत्तै आरती र पुष्पाञ्जली, ७ः१५ देखि ९ बजेसम्म भजन कीर्तनसहितको श्रीमद्भागवत महात्म्य वाचन हुने मुल समितिका संयोजक डाक्टर सुरेश कुमार कानोडियाले जानकारी दिए ।

यो पनि पढ्नुहोस् ‘बैकुण्ठधाम’ निर्माणका लागि नेपालगन्जमा आध्यात्मिक महोत्सव शुरु

महोत्सवमा ईच्छुक श्रद्धालु भक्तजनबाट ब्रतबन्ध, लाखबत्ती प्रज्वलन, तुलादान, भूमिदान, गौदान, चौरासीपूजा गर्न गराउन सक्ने व्यवस्था मिलाइएको मुल समितिका महासचिव श्रीराम सिग्देलले बताए ।

महोत्सवबाट संकलन भएको रकमबाट बाँकेको डुडुवा गाउँपालिका वडा नम्बर–५ सिधनियाघाटमा आधुनिक सुबिधासम्पन्न दाहसंस्कार स्थल (बैकुण्ठधाम) निर्माण गर्ने आयोजकको लक्ष्य रहेको छ । धामलाई स्तरउन्नती गर्दै विद्युतिय दाहसंस्कार समेत निर्माण गर्ने योजना रहेको संयोजक कानोडियाले बताए ।

यो पनि पढ्नुहोस्  कार्तिक अन्तिम साता नेपालगन्जमा बैकुण्ठधाम अध्यात्मिक महोत्सव