नेपालगन्ज २८ कार्तिक : बाँकेको नेपालगन्जको फुलटेक्रास्थित हडिया बाबा मन्दिर परिसरमा लाग्ने मेला तथा रामलिलाको तयारी पुरा भएको छ । आयोजक हडिया बाबा मन्दिर ब्यवस्थापन समितिले बुधबार पत्रकार सम्मेलन गरेर तयारी पुरा भएको जानकारी दिएको हो ।

पछिल्लो ५८ वर्षदेखि नियमित लाग्दै आएको ५९ औं मेलाको सम्पूर्ण तयारी पुरा भएको समितिका अध्यक्ष नन्दलाल बैश्यले बताए । मेलामा नेपाल र भारतका विभिन्न स्थानबाट गरेर ८ सय बढी साधु तथा सन्तहरु आउने जानकारी दिए । 

‘गतवर्ष मात्रै साढे ७ सयजति साधु तथा सन्तहरु आएका थिए, हामी उनीहरुलाई फर्किदाँखेरी एक-एक वटा कम्बल र दक्षिणा दिन्छौं, सोही आधारको संख्या हो यो,’ उनले भने ‘यसवर्ष अझ बढी साढे ८ सय जति आउने अनुमान गरेका छौं ।’

मेला आईतबार (मंसिर २ गते)देखी सुरु भएर ६ दिनसम्म चल्ने आयोजकले जनाएको छ । मेला अवधिभर साधु, सन्त तथा भक्तजनहरुलाई भण्डारा खुवाउने र रामलिला धार्मिक नाटक मञ्चन समेत गरिने बताइएको छ ।  

आयोजकका अनुसार मंसिर २ गते ‘रुद्री पूजा’, ३ गते ‘श्रीराम जनम’, ४ गते ‘कालिया नाग नाथन’, ५ गते ‘सुदामा चरित्र’, ६ गते ‘मीरा चरित्र’ र ७ गते ‘धनुष यज्ञ’ गरिनेछ ।

हरेक वर्ष कार्तिकी स्नान मेलाको तेस्रो दिनमा हडिया बाबा मन्दिर परिसरमा मेला लाग्ने प्रचलन रहेको आयोजकले जनाएको छ । ‘यही दिन हडिया बाबाको वाार्षिक पुण्यतिथी पर्दछ, सोही दिनदेखी यहाँ मेला लाग्छ,’ बैश्यले भने –‘गत वर्ष मंसिर १३ गते हडिया बाबाको वार्षिक पुण्यतिथी परेको थियो भने यस वर्ष मंसिर २ गते सोमबार परेकोछ ।’

उनका अनुसार मेला अवधिभर २५ लाख बढीको खर्च हुने अनुमानछ । यो भक्तहरु स्वयमले भण्डारा लगायतको खर्च हो । तर समितिबाट करीब साढे चार लाख खर्च हुने गरेकोछ । मेला अवधिभर बेलुका ७ बजेदेखि राती १२ बजेसम्म सञ्चालन हुनेछ । 

हडिया बाबा मन्दिरको ऐतिहासिक महत्व रहेको अध्यक्ष बैश्यले सुनाए । मन्दिरमा आएर भाकल गर्ने ब्यक्तिको मनको चाहना पुरा हुने विश्वास रहेको अध्यक्ष बैश्यको भनाई छ । पत्रकार सम्मेलनमा मन्दिर ब्यवस्थापन समितिका पदाधिकारी, सञ्चारकर्मी लगायतको उपस्थिती रहेको थियो ।