नेपालगन्ज २ मंसिर : आगामी मंसिर १६ गते हुने स्थानीय तहमा रहेका रिक्त पदहरूको उपनिर्वाचनका लागि आज मनोनयन दर्ता भएकाछन् । 

निर्वाचन आयोगले बिहान १० बजेदेखि बेलुका ५ बजेको समयसम्म मनोनयन दर्ता गर्ने कार्यपालिका तय गरेको थियो । सोहीअनुसार दलहरूले मनोनयन दर्ता शुरु गरेका हुन् । मनोनयन दर्ता भएसँगै उपनिर्वाचन हुने ठाउँमा चुनावी रमझम सुरु भएको छ ।

निर्वाचन आयोगका अनुसार विभिन्न कारणले रिक्त रहेका स्थानीय तहका जिल्ला समन्वय समितिका दुई प्रमुख, नगरपालिकाका प्रमुख तथा उपप्रमुख एक÷एक, गाउँपालिका अध्यक्ष दुई, उपाध्यक्ष चार र वडाध्यक्ष ३४ गरी कुल ४४ पदमा यस पटक उप निर्वाचन भइरहेको छ । 

यसैबीच, लुम्बिनी प्रदेशको बर्दिया जिल्ला ठाकुरबाबा नगरपालिका वडा नम्बर ४ मा हुने स्थानीय तह उपनिर्वाचनका लागि ६ दलले मनोनयन दर्ता गराएकाछन् ।

आईतबार भएको मनोनयन दर्तामा नेपाली काँग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी (रास्वपा), राप्रपा र नागरिक उन्मुक्ति पार्टी (नाउपा) गरी ६ दलले उम्मेदवारी दर्ता गराएका हुन् ।

काँग्रेसबाट अमिन थारु, एमालेबाट विष्णुप्रसाद देवकोटा, माओवादीबाट शेर बहादुर थारु, रास्वपाबाट बासुदेव शर्मा, राप्रपाबाट रत्न शाही, नाउपाबाट प्रितिलाल थारुले उम्मेदवारी दर्ता गराएका छन् ।