नेपालगन्ज ४ मङ्सिर : गहुँ छर्ने सिजनमै डिएपी मल अभाव भएपछि यतिबेला बाँकेका किसानलाई सास्ती भएको हो । बाँकेमा डिएपी (रासायनिक मल)को माग उच्च भएको छ । माग अनुसार डिएपी मल वितरण हुन नसक्दा बाँकेका किसानले सहजरुपमा आवश्यक डिएपी मल पाउन सकेका छैनन् ।

गहुँ छर्ने सिजनमै डिएपी मल अभाव भएपछि यतिबेला किसानले बजारमा महंगोमा दरमा खरिद गर्न बाध्य भएकाछन् ।  कृषि सामग्री कम्पनी लिमिटेडको शाखा कार्यालय नेपालगन्जमा डिएपी मलको अत्यन्तै न्यून मात्रामा मौज्दात रहेकाले किसानले आवश्यकता अनुसार डिएपी मल पाउन नसकेका हुन् ।

यो पनि पढ्नुहोस्  बाँकेमा वार्षिक ८ हजार ८ सय मेट्रिक टन मलखाद विक्री गर्दै कम्पनी

कृषि सामग्री कम्पनी लिमिटेड नेपालगन्जका शाखा प्रबन्धक पुष्पराज श्रेष्ठले गहुँको सिजन सुरु भएसंगै डिएपी मलको माग उच्च भए पनि मौज्दात अत्यन्तै न्यून भएका कारण माग अनुसार पूर्ति गर्न नसकिएको बताए ।

‘बाँकेमा करिब पाँच हजार मेट्रिक टनभन्दा बढी डिएपी मल आवश्यक हुन्छ, यस आर्थिक वर्षमा हाम्रो लक्ष्य र माग २५ सय मेट्रिक टनको थियो, जम्मा ६८५ मेट्रिक टन प्राप्त भयो’ शाखा प्रबन्धक श्रेष्ठले भने–‘यति कम मात्रामा रहेको मलले कसरी माग अनुसार पु¥याउन सकिन्छ ? त्यही पनि सबै सहकारी संस्थालाई बराबर गरेर वितरण गरिरहेका छौँ ।’

यो पनि पढ्नुहोस् बाँकेका किसानलाई वर्षेनी रासायनिक मल पाउन सकस

‘गहुँ छर्ने सिजनमा माग ह्वात्तै बढ्दो छ, हाम्रोमा मात्र हैन देशैभरी डिएपीको माग बढी नै छ, तर मौज्दात न्यून हुँदा माग अनुसार परिपूर्ति गर्न सकिएको छैन ।’ श्रेष्ठले भने,‘हाम्रोमा त अलिअलि भएका कारण त्यसैलाई वितरण गरिरहेका छौँ, अन्य जिल्लामा त त्यो पनि छैन, यस वर्ष बाँकेमा सिक्टा सिँचाइका कारण सिँचित क्षेत्र बढेका कारण पनि अन्य वर्षमा भन्दा यस वर्ष बढी नै माग देखिन्छ ।’

शाखा प्रबन्धक श्रेष्ठका अनुसार यस वर्ष ६ हजार मेट्रिक टन युरिया, २५ सय मेट्रिक टन डिएपी र तीन सय मेट्रिक टन पोटासको लक्ष्य र माग गरिए पनि युरिया ४०२०.५०० मेट्रिक टन, डिएपी ६८५ मेट्रिक टन र पोटास ७५ मेट्रिक टन प्राप्त भएको जानकारी दिए । उनका अनुसार कार्तिक २८ गतेसम्म कम्पनीको गोदाममा युरिया १४२८.५०० मेट्रिक टन, डिएपी १२३.६०० मेट्रिक टन र पोटास १२ मेट्रिक टन थियो ।

नेपालमा मल ल्याउने जिम्मा पाएको आइपीएलले समय मै डिएपी नल्याउँदा देशैभर डिएपी मलको अभाव जस्तो देखिएको हो ।

यो पनि पढ्नुहोस् बाँकेमा २ प्रतिशत मात्र रोपाई

‘नेपालमा मल ल्याउने जिम्मा पाएको आइपीएलले डिएपी नल्याउँदा जताततै समस्या देखिएको छ, कुनै प्राविधिक कारणले डिएपी नेपालमा आउन नसकेको हुन सक्छ, हामीले ल्याउने ठाउँ मै डिएपी छैन, मङ्सिरको अन्तिमसम्म आइपुग्छ कि भन्ने अपेक्षा गरेका छौँ,’ उनले भने ।

बाँकेमा रहेका आठ स्थानीय तहमा सूचीकृत सहकारी संस्थाहरुले स्थानीय तहकै सिफारिसमा कम्पनीको कार्यालयबाट मल लैजाने र किसानहरुलाई बिक्री वितरण गर्दै आएका छन् । 

यो पनि पढ्नुहोस्  सिचाईँ अभावमा बाँकेका किसान आकाशे पानीको भरमा खेती गर्न बाध्य

बाँकेमा नेपालगन्जमा २६ वटा, कोहलपुरमा चार वटा, नरैनापुरमा तीन वटा, राप्तीसोनारीमा १५ वटा, डुडुवामा २५ वटा, बैजनाथमा १२ वटा, खजुरामा २३ वटा र जानकीमा १७ वटा गरी कुल १२५ वटा सहकारीले मल बिक्री वितरण गर्ने गरेका छन् ।