नेपालगन्ज ६ मंसिर : नेकपा माओबादी केन्द्रले जिल्लाका आठवटै पालिकामा एकैपटक पार्टी अधिवेशन गर्ने भएकोछ । नेकपा माओवादी केन्द्र जिल्ला समन्वय समिति बाँकेले जिल्लामा रहेका आठ वटा पालिकामा एकैपटक पार्टीको अधिवेशन सम्पन्न गर्ने भएको हो ।

नेपालगन्जमा बिहीबार आयोजना गरिएको पत्रकार भेटघाट कार्यक्रममार्फत् माओवादी केन्द्र बाँकेले जिल्लाका सबै पालिकामा एउटै मितिमा पालिका अधिवेशन सम्पन्न गर्न लागिएको जनाएको छ । माओवादी केन्द्र बाँकेका संयोजक नरेन्द्र पाण्डे ‘जेम्स’ले जिल्लाका सबै पालिकामा आगामी मङ्सिर २९ र ३० गते एकैपटक पालिका अधिवेशन सम्पन्न गर्न लागिएको जानकारी दिए ।

‘बाँकेका ८१ वटा वडामध्ये हालसम्म ७५ वटा वडाको अधिवेशन सम्पन्न गरिसकेका छौँ, बाँकी रहेका वडाहरुमा मङ्सिर १२ गतेसम्म अधिवेशन सम्पन्न गर्दैछौँ ।’ संयोजक पाण्डेले भने, ‘सबै वडाको अधिवेशन सकिएपछि आगामी मङ्सिर २९ र ३० गते सबै पालिकामा एकैपटक पालिका अधिवेशन गर्ने योजना बनाएका छौँ ।’

उनका अनुसार पालिका सम्मेलन सफल बनाउनका लागि खजुरामा केन्द्रिय सदस्य आइपी खरेल र लुम्बिनी प्रदेश सदस्य डम्बरबहादुर बिक ‘तुफान’, डुडुवामा केन्द्रिय सल्लाहकार प्रकाश सुवेदी ‘चन्द्रकान्त’ र लुम्बिनी प्रदेश सचिवालय सदस्य गेहराज रिजाल ‘नवीन शर्मा’, बैजनाथमा जिल्ला इन्चार्ज पूर्णा सुवेदी, नरैनापुरमा केन्द्रिय सदस्य नरेन्द्र न्यौपाने, जानकीमा केन्द्रिय सदस्य अन्जना थारु, कोहलपुरमा केन्द्रिय सदस्य उषा पुन र जिल्ला संयोजक नरेन्द्र पाण्डे, राप्तीसोनारीमा केन्द्रिय सदस्य कृष्णा केसी ‘नमुना’ र पट्टु थारु, नेपालगन्जमा प्रदेश सहसचिव अक्कलबहादुर बम र जिल्ला सचिव डिल्ली बराललाई जिम्मेवारी दिइएको छ ।

जिल्लामा रहेका पार्टी केन्द्रिय सदस्य, प्रदेश सदस्य, जिल्ला समन्वय समिति सदस्य, प्रदेश सल्लाहकार, प्रदेश परिषद् सदस्यहरुलाई आ–आफ्नो जिम्मेवारीसहित कार्यविभाजन प्रदान गरिएको छ । व्यापक जनपरिचालनसहित व्यापक पार्टी सदस्यहरुको सहभागितामा पालिका अधिवेशन सम्पन्न गरिने संयोजक पाण्डेले बताए ।

माओवादी केन्द्रका बाँके इन्चार्ज पूर्णा सुवेदीले पार्टीको विधि विधान अनुसार सबै पालिकाका अधिवेशन सम्पन्न हुने बताइन । उनले वडा भेलाबाट प्रतिनिधि छनोट हुने र आन्तरिक प्रतिष्पर्धाबाटै अधिवेशन सम्पन्न हुने बताइन । ‘सकेसम्म सर्वसम्मतिबाटै पदाधिकारी तथा सदस्य छनोट हुनेछन्, कुनै कारणवश त्यसो हुन नसके निर्वाचन प्रक्रियाबाट समेत नेतृत्व चयन हुन्छ ।’ उनले भने, ‘कुनै नेताको दवाव र टीका लगाएर कुनै पनि नेतृत्व चयन हुनेछैनन् ।’

माओवादी केन्द्र बाँकेका अनुसार पार्टी सदस्यताको नवीकरणलाई तीब्रता दिइएको छ । हालसम्म जिल्लामा पाँच हजार ५५५ जना पार्टी सदस्यको सदस्यता नवीकरण भइसकेको छ । मङ्सिर १५ गतेसम्म सबै सदस्यहरुको अभिलेखिकरण गरिसक्ने र कार्ययोजना अनुसार मङ्सिर २५ गतेसम्म सबै पालिकाको अधिवेशन प्रतिनिधि छनोट गरिसक्ने माओवादी केन्द्र बाँकेले जनाएको छ ।