नेपालगन्ज १० मंसिर : साताको दोस्रो दिन सोमबार नेपाली बजारमा सुनको मूल्य तोलामा १५ हजार नौ सय रुपैयाँले घटेको छ । सोमबार सुनको मूल्य प्रतितोला एक लाख ५१ हजार तीन सय रुपैयाँ कायम भएको नेपाल सुनचाँदी व्यवसायी महासंघले जनाएको छ ।

आईतबार सुनको मूल्य प्रतितोला एक लाख ६७ हजार दुई सय रुपैयाँमा कारोबार भएको थियो । सरकारले सुनको भन्सार दरलाई २० प्रतिशतबाट १० प्रतिशतमा झारेपछि सुनको मूल्यमा असर परेको हो ।
त्यस्तै चाँदीको मूल्य पनि तोलामा १ सय १५ रुपैयाँ घटेको छ ।

आईतबार तोलाको एक हजार नौ सय ६० रुपैयाँमा कारोबार भएको चाँदी आज तोलाको एक हजार आठ सय ४५ रुपैयाँ भएको छ ।

उता, भारतमा भने पूर्ण बजेट आउँदा भन्सार दर घटेको थियो । त्यसले नेपालमा सुन महँगो र भारतमा सस्तो हुन पुगेको थियो । यसले बजारमा तस्करीको सुन आएको आशंका गरिएको छ । औपचारिक प्रणालीबाट आउने सुनको परिमाणमा भारी गिरावट देखिएको छ ।