नेपालगन्ज : तस्करी, राजश्व लगायत विभिन्न विवादमा मुछिदै आएका सशस्त्र प्रहरीका एसपी बिमल डाँगीको अन्तत्ःसरुवा भएको छ । बाँके जिल्लाको सिमावर्ती बालेगाउँमा अवस्थित सशस्त्र प्रहरी बल नेपाल नम्बर ३० गण हेड्क्वाटर बागेश्वरीका गणपति एसपी डाँगीको सशस्त्र प्रहरी बल नेपाल प्रहरी कार्यालय कार्य विभागमा सरुवा भएको छ ।

एपिएफ एसपी डाँगीको शुक्रबार राती हेडक्वाटरले सरुवा गरेको हो । सीमा सुरक्षासँगै भन्सार राजश्व छलि तथा  चोरी  नियन्त्रण गर्न असफल देखिएपछि केही दिन अघि मात्र एसपी डाँगी सशस्त्र प्रहरी हेड्क्वाटर तानिएका थिए । 

सशस्त्र प्रहरीका आइजिपी राजु अर्यालले एसपी डाँगीलाई ठुलै कार्वाही गर्न खोजेका थिए । तर काँग्रेस नेता पूर्ण बहादुर खड्का पावरले एसपी डाँगीको जागिर जोगिएको थियो । दुई हप्ता हेडक्वाटरमा हाजिर लगाएका डाँगी केही दिन अघि मात्र बाँके फर्किएका थिए । नेता खड्काकी श्रीमती र एसपी डाँगीकी श्रीमती एउटै माइती घरका हुन् । 

एसपी बिमलको ठाउँमा अर्थात् सशस्त्र प्रहरी बल नेपाल नम्बर ३० गण हेड्क्वाटर बागेश्वरी, बाँकेमा एपीएफ एसपी शोभाकान्त खनालको सरुवा भएको छ । नेपाल भारत सिमा क्षेत्रमा रहेको यो ३० गण पैसा कमाउन निकै मालदार मानिन्छ ।