नेपालगन्जः बाँकेमा सोमबार पिसिआर परीक्षणबाट कोरोना पोजेटिभ पुष्टि भएका संक्रमितहरु क्वारेन्टिनमै अलपत्र अवस्थामा रहेकाछन् ।
कोरोना पुष्टि भएका ४७ जना बाँकेको दुर्गम मानिने नरैनापुर क्षेत्रका क्वारेन्टिनमा रहेकाछन् । उनीहरु यतिबेला बिजोग अवस्थामा छन् । न खाने गास पाइरहेका छन् भने न सुत्ने ठाँउ नै राम्रो पाइरहेकाछन् । ४० डिग्रीको तापक्रममा टिनको छानामुनी गर्मी र मच्छरको टोकाईकाबीच छटपटाउदैँ रात कटाइरहेकाछन् ।

न संक्रमितहरुलाई आफू संक्रमित भएको थाहा छ । न त संक्रमित नभएकाहरुलाई उनीहरु संक्रमित हुन भन्ने थाहा छ । कोरोना पुष्टि भइसके पनि ती ४७ जना कोरोना नदेखिएकाहरुसगैं एउटै क्वारेन्टिनमा बस्न बाध्य भएकाछन् ।

बाँके जिल्लामा एकैदिन ठूलो संख्यामा संक्रमित भेटिएपछि जिल्लाभर सन्त्रास छाएकोछ । न मान्छेहरुको आवागमन व्यवस्थित छ । न क्वारेन्टिनमा राखिएकाहरु व्यवस्थित छन् । न त कोरोना पोजेटिभ देखिएकाहरु सुरक्षित तवरले आइसोलेसनमा बस्न पाएकाछन् । प्रशासनको चरम लापरबाही र स्थानीय निकायसगं समन्वय अभावमा लकडाउनको दुई महिना वितिसक्दा पनि सबै कुरा व्यवस्थित हुनसकेको छैन ।

जिल्लाको शान्ति सुरक्षाको जिम्मेवारी पाएका बाँकेका प्रमुख जिल्ला अधिकारी कुमारबहादुर खड्काको झन् कोरोनाको महामारीको अवस्थामा मोबाइल अफ रहेकोछ ।

कोरोना पुष्टि भएपनि बाँके प्रशासनले उनीहरुलाई छुट्टै आइसोलेसनमा राख्न सकेको छैन । झण्डै तीन सय जनाको संख्यामा क्वारेन्टिनमा रहेकाहरुबीचनै सोमबार पोजिटभ भेटिएका ४७ जना संक्रमितहरुसगैं बसेका छन् ।

जिल्ला प्रहरी बाँकेका एसपी वीरबहादुर ओलीका अनुसार कोरोना पोजेटिभ देखिएका ४७ जनालाई ब्यवस्थित तरिकाले राख्नका लागि सोमबार अबेर राती ८ बजेसम्म जिल्ला स्थित सुरक्षा समितिको बैठक बसेपनि उनीहरुलाई ब्यवस्थापन गर्न नसकेको बताए ।

कोरोना संक्रमितहरुलाई नै हामी कोरोना संक्रमित हो भन्ने अहिलेसम्म थाहा छैन । संक्रमित ४७ जना क्वारेन्टिनमा बसेका ३ सय जनाहरुसगैं अहिलेसम्म घुलमिल गरेर बसेका छन् । यसले पनि थप संक्रमण बढ्न सक्ने जोखिम देखिएकोछ ।

‘संक्रमितहरुलाई नरैनापुर स्थित स्वास्थ्य कार्यालयको भवनमा राख्ने कुरो सुरक्षाकर्मीको छलफलबाट निर्णय भएको छ । मेडिकल कलेजहरुबाट बेड मागेका छौं, अहिले राती भइसक्यो भोली विहानसम्म बेडहरु लगेर संक्रमितहरुलाई राखिनेछ ।’ एसपी ओलीले सेतोखरीलाई जानकारी दिदै भने–‘नरैनापुर क्षेत्रका ३/४ वटा क्वारेन्टिनमा सबै संक्रमित र संक्रमित नभएकसगैं बसेका छन् । त्यहाँबाट कोरोना पोजेटिभ देखिएकाहरुको नाम लगेर क्वारेन्टिनमा बसेकाहरुबाट नाम बोलाउदै पहिचान गर्दै गर्नुपर्छ । राती भइसकेकाले सम्भव भएन भोली पहिचान गरेर स्वास्थ्य कार्यालयको भवनमा राख्नेछौं ।’

बाँकेमा आइसोलेसन बेड नभएपछि कोरोना पोजेटिभ भेटिएका संक्रमितहरु अलपत्र अवस्थामा रहनपुगेका छन् । सरकारले नेपालगन्ज स्थित नेपाल प्रहरीको अस्पताल र नेपाली सेनाको अस्पताललाई कोरोना अस्पताल घोषणा गरेपनि ती अस्पतालहरुमा कोरोनाका विरामीलाई राख्न नदिदाँ संक्रमितहरुको बिजोग हुन पुगेकोछ ।