नेपालगन्ज : कोरोना संक्रमणबाट मृत्यु भएका पुरुषको शव तीन दिन देखि अस्पतालमा अल्पत्र अवस्थामा छ । पिपिइ किन्ने पैसा र शव बोक्ने एम्बुलेन्सको अभावमा कोरोनाबाट मृत्यु भएका पुरुषको शव तीन दिनदेखि अल्पत्र परेको हो ।

बाँकेका प्रमुख जिल्ला अधिकारी रामबहादुर कुरुम्वाङ्गले शव बोक्ने एम्बुलेन्स नपाउँदा कोरोनाबाट मृत्यु भएका पुरुषको शव व्यवस्थापन गर्न नसकिएको जानकारी दिए ।

सम्बन्धित निकायहरुबाट सहयोग नपाई रहेको जनाउदै प्रजिअ कुरुम्वाङ्गले पिपिइ किन्ने पैसा र शव बोक्ने एम्बुलेन्स नपाउँदा मृतक पुरुषको शव व्यवस्थापन गर्न नसकिएकोे बताए ।

‘शव व्यवस्थापन गर्दा प्रयोग गरिने सामग्रीहरु खरिद गर्न ५० ६० हजार लाग्छ कसैले सहयोग गर्दैन । शव बोक्ने एम्बुलेन्स खोज्दा भेटिदैन ।’ प्रजिअ कुरुम्वाङ्गले सेतोखरीसँग मंगलबार विहान भने ‘तीन दिनदेखि शव अस्पतालमा छ, म त्यसैका लागि लागिरहेको छु ।’

प्रजिअ कुरुम्वाङ्गले कोरोनाबाट मृत्यु भएकाहरुको शव व्यवस्थापनमा प्रयोग गर्नका लागि प्रदेश सरकारले नेपालगन्ज जनस्वाथ्यलाई एम्बुलेन्स खरिद गर्ने रकम दिएपनि खरिद नगर्दा यो समस्या आएको बताए ।

‘मैले सिधै प्रदेश न. ५ का मुख्य मन्त्रीसँग कुरा गरे एम्बुलेन्स चाहियो भनेर । प्रजिअ कुरुम्वाङ्गले भने ५ महिना अघिनै एम्बुलेन्स खरिद गर्नका लागि रकम पठाई सकेको जानकारी दिनु भयो । तर यहाँ एम्बुलेन्स खरिद गरिएको रहेनछ ।’प्रजिअ कुरुम्वाङ्गले भने ।

एम्बुलेन्स खरिद गर्ने काम नेपालगन्ज उपमहानगरपालिका स्थित जनस्वास्थ्य शाखाको हो ।

अछाम चौरपाटी निवासी ५० वर्षिय ती पुरुषलाई विरामी भएपछि कोहलपुर स्थित मेडिकल कलेजमा भर्ना गरिएको थियो । कोरोना संक्रमित ती पुरुषको नेपालगन्ज मेडिकल कलेज शिक्षण अस्पताल कोहलपुरमा उपचारका क्रममा मृत्यु भएको थियो । उनको उपचारको क्रममा आईतबार साँझ ७ः३० बजे मृत्यु हुन पुगेको थियो । तर, ती पुरुषलाई कोरोना पोजेटिभ भएको सोमबार मात्र थाहा भएको प्रजिअ कुरुम्वाङ्गले जानकारी दिए ।

बाँकेमा आईतबार नै एक महिलाको उपचारका क्रममा कोहलपुर मेडिकल कलेजमै कोरोनाबाट मृत्यु भएको थियो । हालसम्म बाँकेमा कोरोनाबाट ४ जनाको मृत्यु भइसकेको छ ।