नेपालगन्ज : नेपालगन्ज न्यूरोड स्थित न्यू होटल ईन्द्रेणीले आइसोलेसनका नाममा कोरोना पोजेटिभ भएकाहरुबाट अबैध रुपमा रकम असुलीरहेको छ भने स्वास्थ्य मन्त्रालयको नियम विपरित आइसोलेसन सञ्चालन गरिरहेको छ ।

जिल्ला प्रशासन कार्यालय बाँकेले नेपालगन्जको न्यू होटल ईन्द्रेणीलाई कोरोना पोजेटिभ राख्ने आइसोलेसनको अनुमति दिएको छ । तर, आइसोलेसनका नाममा न्यू होटल ईन्द्रेणीले कोरोना पोजेटिभ विरामीबाट अबैध रकम असुलीरहेको तथ्य फेला परेको छ ।

न्यू होटल ईन्द्रेणीले कोभिड–१९ स्वास्थ्य मन्त्रालयको नियम विपरित आइसोलेसन चलाई रहेको छ । तर, आइसोलेसन राख्न अनुमति दिने, निर्देशन दिने र अनुगमन गर्ने जिल्ला प्रशासन कार्यालय बाँके तथा कोभिड– १९ संकट व्यवस्थापन केन्द्र बाँके चुपचाप रहेको छ ।

आइसोलेसन तोकिएको न्यू होटल ईन्द्रेणीमा कोरोना पोजेटिभ भइ लक्षण नदेखिएका विरामीलाई राख्ने गरिन्छ र यस होटलको आइसोलेसनमा विरामीहरु जिल्ला प्रशासन कार्यालयबाट सिफारिस भएको रकम तिरेर बस्न पाउँछन् । त्यसैका लागि यो होटललाई आइसोलेसनका अनुमति दिइएको हो ।

यस न्यू होटल ईन्द्रेणीको आइसोलेसनमा कोरोना पोजेटिभ भएका विरामीहरु १४ दिन अनिवार्य बस्नुपर्छ र १५ दिनको दिन जिल्ला कोभिड– १९ संकट व्यवस्थापन केन्द्रले डिस्चार्ज रिपोर्ट पठाएपछि मात्र होटलले विरामीलाई छोड्न मिल्छ । अन्यथा होटलको आइसोलेसनमा दर्ता भइसकेको विरामी आईसोलेसन छोडी कहिं गएमा वा डिसचार्जको पत्र नआउँदै १५ औं दिन भन्दा अगाडी होटलले छोडिदिएमा त्यसको सम्पूर्ण जिम्मेवारी आइसोलेसन सञ्चालक हुनुपर्छ र कारवाहीको भागिदार बन्नु पर्छ ।

कोरोना आइसोलेसन रहेको न्यू होटल ईन्द्रेणीले कोरोना पोजेटिभ भएका विरामीको होटलमा नाम दर्ता गराईदिने तर, उनीहरुलाई घरमा बस्न दिने र ती विरामीबाट घरमा बस्न दिएपनि १४ दिनकै रकम असुल गर्ने गरेको तथ्य सेतोखरीसँग रहेको छ ।

त्यसैगरी होटलको आईसोलेसनमा बसेका तर, कोभिड–१९ जिल्ला संकट व्यवस्थापन केन्द्रको डिस्चार्ज पत्र नआउँदै १४ दिन अगाडी नै कोरोना पोजेटिभ विरामीलाई छोडीदिने र उनीहरुबाट १४ दिन होटलमा बसेकै रकम लिने गरेको तथ्य प्रमाण पनि सेतोखरीसँग रहेको छ ।

यस आइसोलेसनबाट कोरोना पोजेटिभ भएका कोही १० दिनमा, कोही, ११ दिनमा, कोही १२ दिनमा, कोही १३ दिनमा घर जाने गरेका छन् तर, उनीहरुबाट होटलले १४ दिन बसेको रकम असुली रहेको छ । यसरी कम दिन बसेर १४ दिनकै रकम तिर्ने ब्यक्ति सेतोखरीको सम्पर्कमा रहेकाछन् ।

यसरी कोरोना आइसोलेसन सञ्चालन गरेको न्यू होटल ईन्द्रेणीले कोरोना पोजेटिभ विरामीबाट अबैध रुपमा रकम असुलीरहेको छ । नेपालगन्ज– १ निवासी सुजन केसीले आइसोलेसनका नाममा लुट मच्चाउने होटल सञ्चालकलाई प्रशासनले हदैसम्मको कारबाही गर्नु पर्ने र आइसोलेसन खारेज गरी अबैध रुपमा असुल गरेको रकम सम्बन्धित कोरोना विरामीलाई फर्काउनु पर्ने बताउँछन् ।

सुरुमा निकै चर्को स्वरमा बोलेका आइसोलेसन सञ्चालक न्यू होटल ईन्द्रेणीका मालिक घनश्याम थापाले आफ्नो होटलमा केही त्यस्तो नभएको र भएको प्रमाणित भए आइसोलेसन बन्द गरी जुनसुकै कारबाही भोग्न आफु तयार रहेको बताए । तर, सेतोखरीसँग भएका तथ्य बारे एकपछि अर्को प्रश्न गर्दा होटल सञ्चालक थापाले केही गल्ती भएको स्विकार गरे ।

सञ्चालक थापाले भने ‘कोरोना पोजेटिभ भएको विरामी आइसोलेसनमा बसेको भनि नाम दर्ता देखाई उक्त विरामी घरमा बसेको कुरा साँचो हो म गल्ती स्विकार गर्छु । अब मैले के गर्नुपर्छ म सच्याउँछु ।’ जिल्ला कोभिड–१९ संकट व्यवस्थापन केन्द्र बाँकेका सदस्य तथा जिल्ला प्रशासन कार्यालय बाँकेका प्रशासकीय अधिकृत रामकुमार सोनकरले छानविन गरिने र प्रमाणित भए आइसोलेसन बन्द गरी कारबाही गरिने बताए ।

प्रशासकीय अधिकृत सोनकरले कोरोना पोजेटिभ देखिएको विरामी १४ दिन अनिवार्य आइसोलेसनमा बस्नु पर्ने १५ दिनको दिन डिस्चार्ज हुने नियम रहेकोले त्यो भन्दा अगाडी होटलले छोडे कारबाही गरिने बताए ।