सप्तरी : तिव्र गतिमा कुदिरहेको दुई मोटरसाइकल एकअर्कामा ठोक्किँदा दुईजनाको मृत्यु भएकोछ । सप्तरीको हुलाकी सडक अन्तर्गत खडक नगरपालिका– ११ बनौलीमा दुई वटा मोटरसाइकल एकआपसमा ठोक्किँदा उपचारका क्रममा दुई जनाको मृत्यु भएको हो ।

मृत्यु हुनेमा डाक्नेश्वरी नगरपालिका–१० बनौलीका ३० वर्षीय हाकिम राइन र खडक नगरपालिका–११ बिसहरियाका २९ वर्षीय नरेश साह रहेको ईलाका प्रहरी कार्यालय कल्याणपुरले जनाएको छ ।

गएराति भएको दुर्घटनामा परि गम्भीर घाइते भएका दुवै जनाको बोदेवर्साइनस्थित जीवनदीप अस्पतालमा उपचारको क्रममा मृत्यु भएको हो ।

पश्चिमबाट पूर्वतर्फ गइरहेको स८प ८४८१ नरम्बरको मोटरसाइकल र विपरीत दिशाबाट आउँदै गरेको प्रदेश २–०१–००१ त ३७०१ नम्बरको मोटरसाइकल एकआपसमा ठोक्किएको थियो ।

मृतक हकिम स८प ८४८१ नम्बरको मोटरसाइकलमा पछाडी सवार थिए । भने उक्त मोटरसाइकलका चालक डाक्नेश्वरी नगरपालिका–१० बनौलीका २२ वर्षीय गुड्डु अन्सारी गम्भीर घाइते भएका छन् ।

यसैगरी अर्का मृतक खडक नगरपालिकाका–११ बिसहरियाका साह प्रदेश २–०१–००१ त ३७०१ नम्बरको मोटरसाइकलका चालक हुन् । उक्त मोटरसाइकलमा पछाडी सवार उनकी २६ वर्षीया पत्नी सुनिता साह गम्भीर घाइते भएकी छिन् । घाइतेको उपचारका लागि विरागटनगर पठाइएको जिल्ला प्रहरी कार्यालय सप्तरीले जनाएको छ ।