शनिबार, मंसिर २०, २०७७   १०:३०:४४

सुर्खेतमा इन्धन मिसावट गर्ने पेट्रोल पम्प सिल


सेतोखरी   2077-07-05

सुर्खेत : पेट्रोलमा डिजेल मिसावट गरी बिक्री गरेको पाइएपछि वीरेन्द्रनगरस्थित एक पम्प सिल गरिएको छ ।

जिल्ला प्रशासन कार्यालयले अनुगमनका क्रममा मिसावट गरेको पाएपछि शङ्कर आयल स्टोर्स सिल गरिएको हो । डिजेल मिसावटले मोटरसाइकलको इन्जिनमा खराबी आएपछि स्थानीय उपभोक्ताले प्रशासनमा उजुरी दिएका थिए ।

जिल्ला प्रशासन कार्यालयका प्रशासकीय अधिकृत श्रीशमशेर राणा नेतृत्वको अनुगमन टोलीले मङ्गलबार पेट्रोलको नमुना सङ्कलन गरेको थियो । सङ्कलित नमुना नेपाल आयल निगमको काठमाडौंस्थित प्रयोगशालामा पठाउन निगमको प्रदेश कार्यालय सुर्खेतको जिम्मा लगाइएको छ । प्रशासकीय अधिकृत राणाले अर्को आदेश नहुन्जेलका लागि उक्त आयल स्टोर्स बन्द गरिएको जानकारी दिए ।

अनुगमन टोलीसमक्ष पम्प सञ्चालक डम्मर महताराले डिजल ट्यांकरबाट तेल खन्याउँदा डिजेलको टंकीमा राख्नुपर्नेमा भुलवश पेट्रोलको टंकीमा मिसिन पुगेको बताएका छन् । मिसावटयुक्त पेट्रोल नबेच्न आफ्ना कर्मचारीलाई निर्देशन दिइए पनि नयाँ कर्मचारीले केही उपभोक्तालाई पेट्रोल बेचेको उनको भनाइ छ ।

बिक्रेताले इन्धनमा मिसावट गरेको रिपोर्ट प्रमाणित भए पहिलोपटकका हकमा एक लाख रुपैयाँ जरिवानासहित एक महिनासम्म पेट्रोल पम्प बन्द गरिने कानुनी प्रावधान छ ।