नेपालगन्ज : जिल्लामा बढ्दो बालविवाह रोकथाम तथा न्यूनिकरणका विषयमा प्रहरी र बालबालिकाबीच छलफल शुरु भएकोछ ।

वडा प्रहरी कार्यालय नेपालगन्जको अग्रसरतामा नगरमा रहेका बालबालिका तथा किशोरकिशोरीसंग बालविवाह न्यूनिकरणका विषयमा बहस शुरु गरेको हो ।

विशेषगरि नगरमै बालविवाहका घटना बढ्दै जानु र यसले समाज तथा बालबालिकामा पारेको असरका विषयमा नगरमा रहेका बालबालिका, किशोरकिशोरीसगं वडा प्रहरी कार्यालयले छलफल शुरु गरेको वडा प्रहरी कार्यालय नेपालगन्जका प्रमुख डिल्ली बहादुर खड्काले जानकारी दिए ।

बालबिबाह बिरुद्ध प्रहरी अभियान अन्तर्गत अन्तरक्रिया कार्यक्रम गरी बालबिबाहलाई रोक्ने, निस्तेज गर्ने, कानूनको बर्खिलाप गरी बालविवाह गर्न, गराउन खोज्नेलाई कानूनी दायरामा ल्याउनका लागि वडा प्रहरीले यस्तो प्रयास सुरु गरेको हो ।

छलफलमा सहभागि बालबालिका, किशोरकिशोरीले प्रहरीको साथमा सबै पक्षबाट हातेमालो गरि बालबिबाह एक सामाजिक बिकृति, कुरीति तथा अपराध समेत भएकोले यसलाई जरैबाट निर्मूल पार्न हातेमालो गर्ने प्रतिबद्धत दिए ।

सोक्रममा जिल्ला बालक्लब सञ्जाल बाँकेकी अध्यक्ष मेनुका रावत तथा पूर्व अध्यक्ष श्वेता गुरुङ्ग, नगर बालसञ्जाल नेपालगन्जका पूर्व अध्यक्षद्वय अन्जना चर्तुबेदी र साहिल अन्सारीले नगर तथा जिल्लामा बालविवाह र यसका असरका बारेमा वडा प्रहरी प्रमुख प्रहरी निरीक्षक खड्कालाई जानकारी गराएका थिए ।