शनिबार, मंसिर २०, २०७७   ११:२७:१६

७ किलो अफिम सहित २ जना पक्राउ


सेतोखरी   2077-07-26

नेपालगन्ज : बाँके प्रहरीले ७ किलो अफिम सहित दुईजनालाई पक्राउ गरेकोछ ।

बाँकेको कोहलपुर नगरपालिका वडा नम्बर २, बसपार्क स्थित भेरी गेष्ट हाउसबाट मङ्गलबार बेलुकी अन्दाजी पाँच बजे ७ किलो अफिम सहित दुई जनालाई पक्राउ गरिएको जिल्ला प्रहरी कार्यालय बाँकेले बुधबार पत्रकार सम्मेलनमार्फत जानकारी दिएको हो ।

कोहलपुर बसपार्क स्थित भेरी गेष्ट हाउसको कोठा नमबर १०५ मा लागु औषध अफिम कारोबार भइरहेको खबर पाएको बाँके प्रहरीले छापा हान्दा जाजरकोट नलगाढ नगरपालिका वडा नम्बर ९ निवासी ४५ वर्षिय जय बहादुर सिंह र सोही ठाउँ बस्ने ४५ वर्षिय विरेन्द्रमान सिंहलाई लागु औषध अफिमसहित पक्राउ गर्न सफल भएको छ ।

लागु औषध नियन्त्रण ब्युरो, शाखा कार्यालय नेपालगन्ज र जिल्ला प्रहरी कार्यालय बाँकेको संयुक्त प्रहरी टोलीले उक्त स्थानमा संकास्पद अवस्थामा रहेका जाजरकोट नलगाढ नगरपालिका वडा नम्बर ९ बस्ने यी दुई ब्यक्तिको खानतलासी लिंदा उनीहरुको साथमा रहेको कालो रंगको झोला भित्र ७ वटा प्लाष्टिकको पोका बनाई राखेको अवस्थामा लागुऔषध अफिम बरामद गरी आवश्यक अनुसन्धान एवं कारवाही अगाडि बढाईएको बाँकेका प्रहरी प्रमुख प्रहरी उपरीक्षक ओमबहादुर रानाले जानकारी दिए ।

प्रहरीका अनुसार लागु औषध तथा नियन्त्रण ऐन २०३३ अनुसार १५ वर्ष देखी जन्म कैद र ५ लाख देखी २५ लाखसम्मको जरिवाना हुनेछ ।