शनिबार, माघ ३, २०७७   ०६:१२:३०

देशभर सरकारविरुद्ध काँग्रेसले प्रदर्शन गर्ने


सेतोखरी   2077-08-19

नेपालगन्ज : नेपाली काँग्रेसले आगामी मंसिर २९ गते सरकारविरुद्ध देशभर प्रदर्शन गर्ने भएकोछ ।

केहीदिन अघि तनहुँमा वरिष्ठ नेता रामचन्द्र पौडेलमाथि भएको दुव्यर्वहार र धरपकडको भत्र्सना गर्दै बैठकले आगामी मंसिर २९ गते सरकार विरुद्ध प्रर्दशन गर्ने भएकोछ ।

प्रमुख विपक्षी दल नेपाली काँग्रेसको पदाधिकारी र पूर्वपदाधिकारीहरुको शुक्रबार बसेको बैठकले यस्तो निर्णय गरेको हो ।

‘प्रतिपक्षी विचारलाई निषेध गर्ने दमनकारी रबैया अपनाइएको छ र सरकार अधिनायकवादतर्फ उन्मुख भएको छ,’ बैठकमा सहभागी नेता अर्जुननरसिंस केसीले भने, ‘यसको पछिल्लो कडी तनहुँ घटना हो ।’

तनहुँ घटनाका साथै कोभिड–१९ रोकथाम तथा उपचारमा अव्यवस्थापन र भ्रष्टाचारको मुद्दालाई लिएर २९ गते ७७ जिल्लामै प्रदर्शन गर्ने काँग्रेसको निर्णय गरेको छ ।

यसैबीच काँग्रेस बैठकले संघीय संसदको अधिवेशन छिटो बोलाउन सरकारको ध्यानाकर्षण समेत गराएको छ । जटिलता र चुनौतीपूर्ण अवस्थामा सरकार आफ्नै दलको द्वन्द्वमा अलमलिएको भन्दै काँग्रेसले जनजीविकाका मुद्दाहरु उठाउने थलो संसदको अधिवेशन छिट्टो बोलाउनुपर्नेमा जोड दिएको छ ।

यस्तै पदाधिकारी र पूर्वपदाधिकारीहरुको बैठकमा पार्टीको आन्तरिक विषयमा २७ केन्द्रीय सदस्यले उठाएको मुद्दाबारे छिटो सहमति खोज्ने समझदारी पनि भएको नेताहरुले बताएका छन् ।