नेपालगन्ज : बाँकेमा स्वयसेविका दिवस मनाइएकोछ । कोरोना भाइरस संक्रमणकाबीच १७ औं राष्ट्रिय महिला सामुदायिक स्वास्थ्य स्वयमसेविका दिवस नेपालगन्जमा मनाइएको हो । नेपालगन्ज उपमहानगरपालिकाले दिवसको अवसर पारेर महिला सामुदायिक स्वास्थ्य स्वयमसेविकालाई सम्मान गरेको छ ।

शनिबार आयोजित कार्यक्रममा नगरका २३ जना स्वयमसेविकालाई सम्मान गरिएको हो । नेपालगन्ज उपमहानगरपालिकाका उपप्रमुख उमा थापा मगर, प्रमुख प्रशासकीय अधिकृत ओमबहादुर खड्का, स्वास्थ्य कार्यालय बाँकेका प्रमुख धिरजंग शाह, उपमहानगरपालिकाका स्वास्थ्य शाखा प्रमुख राम बहादुर चन्द लगायतले स्वयमसेविकाहरुलाई सम्मान गरेका हुन् ।

सम्मान कार्यक्रममा महिला सामुदायिक स्वास्थ्य स्वयमसेविका नगर समितिका अध्यक्ष मनकुमारी सिलवाल, अगुवा महिला स्वयमसेविका नारायणी रुपाखेती लगायतले नेपालको स्वास्थ्य क्षेत्र सुधारका लागि आफुहरुको महत्वपूर्ण भूमिका भएपनि सेवा सुविधा र प्रोत्साहन नपाउँदा दुःख लाग्ने गरेको बताए ।

कोरोना भाइरस संक्रमण रोकथाम तथा न्यूनिकरणमा स्वयमसेविकाहरुले समेत महत्वपूर्ण भूमिका खेलेको भन्दै उनीहरुले ६० वर्ष कटेका महिला स्वयमसेविकालाई २० हजार रुपैयाँ दिएर अवकास दिने सरकारको तयारीप्रति आक्रोस पोखेका थिए ।

गर्भवती भएदेखि पाँच वर्षसम्मका बालबालिकाको निगरानी स्वयसेविकाहरुले गरेकाले नेपालको मातृ शिशु मृतयुदर घट्नमा ठूलो भूमिका खेल्नेहरुलाई सरकारले उपेक्षा गरेको अग्रज स्वयमसेविका नारायणी रुपाखेतीले बताइन् ।
कोरोना कहरका बेला माक्स र स्यानिटाइजर समेत नपाई स्वास्थ्य जस्तो गम्भीर क्षेत्रमा आफ्नो ज्यान दाउमा राखेर काम गर्दै आएका स्वयसेविकाको योगदानको मूल्याँकन गर्दै कम्तिमा प्रति ब्यक्ति दुई लाखरुपैयाँ उपदान दिनुपर्ने नगर अध्यक्ष मनकुमारी सिलवालले बताइन् ।

सो अवसरमा नेपालगन्ज उपमहानगरपालिकाका उपप्रमुख उमा थापा मगरले स्वयमसेविकाहरुले नगरमा स्वास्थ्य क्षेत्रमा महत्वपूर्ण योगदान पु¥याएको भन्दै उनीहरुको सेवा, सुविधा विस्तार तथा सम्मानका लागि आफुहरु प्रयासरत रहेको बताइन् ।

दिवसका अवसरमा आयोजित सोही कार्यक्रममा बी–ग्रुप बाँकेले स्वयमसेविका लागि एकलाख ९७ हजार मूल्यको माक्स, स्यानिटाइजर लगायतका ब्यक्तिगत सुरक्षा सामग्री सहयोग गरेको थियो ।