नेपालगन्ज ६ माघ : कोरोना संक्रमणबाट बाँकेमा थप दुई जना संक्रमितको मृत्यु भएको छ । यसरी मृत्यु हुनेमा नेपालगन्ज उपमहानगरपालिकाका दुई जना पुरुषको मृत्यु भएकोछ ।

जिल्ला कोभिड–१९ संकट व्यवस्थापन केन्द्र बाँकेका अनुसार एकजनाको होम आइसोलेसनमा र एकजनाको भेरी अस्पतालमा उपचारका क्रममा मृत्यु भएको हो ।

केन्द्रका अनुसार होम आइसोलेसनमा बसेका नेपालगन्ज उपमहानगरपालिका वडा नम्बर –१० का ७० वर्षीय बृद्धको सोमबार राति साढे ९ बजे मृत्यु भएको हो । भने अर्का नेपालगन्ज उपमहानगरपालिका वडा नम्बर –१ धम्बोजीका ४९ वर्षीय पुरुषको मङ्गलबार विहान ६ः१० बजे भेरी अस्पतालमा उपचारका क्रममा मृत्यु भएको हो ।

होम आइसोलेसनमा रहेका ती ७० वर्षीय बृद्धमा पुस २६ गते कोरोना संक्रमण पुष्टि भएको थियो । कोरोना पुष्टि भएसँगै उनी होम आइसोलेसनमा बसेका थिए ।

होम आइसोलेसनमा रहेकै बेला ती बृद्धको अक्सिजन लेभल कम भएपछि उनलाई पुस २७ गते थप उपचारका लागि भेरी अस्पतालको कोभिड वार्डमा भर्ना गरिएको थियो । भेरी अस्पतालमा उपचाररत ती बृद्धको स्वास्थ्यमा सुधार आएपछि उनलाई पुनः होम आइसोलेसनमा बस्ने गरी पुस २९ गते डिस्चार्ज गरिएको थियो ।

केन्द्रका अनुसार मधुमेह, थाइरोइड, प्रेसर र मानसिक रोगको औषधि सेवन गरिरहेका उनको सोमबार राति ९ः३० बजे आफ्नै निवासमा मृत्यु भएको हो ।

यस्तै नेपालगन्ज उपमहानगरपालिका वडा नम्बर–१ धम्बोजीका ४९ वर्षीय पुरुषको भेरी अस्पतालमा भर्ना भएको १० मिनेटपछि मृत्यु भएको अस्पतालले जनाएको छ ।

कोरोना परीक्षण गर्दा पुस २८ गते उनको रिपोर्ट पोजेटिभ आएको थियो । संक्रमण पुष्टि भएपनि स्वास्थ्य अवस्था सामान्य रहेका कारण उनी होम आइसोलेसनमा बस्दै आएका थिए ।

तर, सोमबार बिहान अचानक बेहोस भएपछि उनलाई भेरी अस्पतालको कोभिड वार्डमा बिहान ६ बजे भर्ना गरिएको थियो ।

रोगको प्रकृति अनुसार उपचार सुरु गरिए पनि उनको स्वास्थ्यमा सुधारन नभएपछि मङ्गलबार बिहान ६ बजेर १० मिनेटमा मृत्यु भएको अस्पताल जनाएको छ ।
योसंगै बाँकेमा कोरोना संक्रमणबाट ज्यान गुमाउनेको संख्या ५१ पुगेकोछ ।

यसैबीच, कोहलपुर नगरपालिकाका मेयर लुटबहादुर रावतलाई कोरोना पुष्टि भएकोछ । जनकार्यमा निरन्तर सक्रिय रहेका नगरप्रमुख रावतलाई सोमबार मात्र कोरोना संक्रमण पुष्टि भएको उनको सचिवालयले जनाएको छ ।

गत पुस २८ गतेदेखि सामान्य रुघाखोकी देखा परेको नगरप्रमुख रावतले आईतबार स्वाब जाँचको लागि नमुना दिएकोमा सोमबार आएको रिपोर्टमा कोरोना पोजेटिभ पाइएको छ ।

हाल उनको स्वास्थ्य अवस्था सामान्य रहेको र घरमै होम आईसोलेसनमा बसेर स्वास्थ्य लाभ लिईरहेको कार्यपालिका सदस्य भिमबहादुर नेपालीले जानकारी दिए ।
यस्तै नगरप्रमुख रावतसंगै उनकी श्रीमति, छोराबुहारी समेतलाई कोरोना संक्रमण पुष्टि भएको छ ।

कोहलपुर नगरप्रमुख रावत कोरोना संक्रमित भएको जिल्ला कोभिड–१९ फोकल पर्शन तेज ओलीले समेत पुष्टि गरेका छन् ।