नेपालगन्ज २३ फागुन : नेपालगन्जमा जारी सातौ संस्करणको प्रधानमन्त्री कप महिला भलिबल प्रतियोगितामा विभागीय टोली त्रिभुवन आर्मी क्लबलाई होङ्गान्जी न्यू डायमण्ड स्पोर्ट्स क्लबले पराजित गरेको छ ।

बाँके जिल्ला भलिबल संघको आयोजनमा नेपालगन्जस्थित रंगशालाको कभर्डहलमा आईतबार भएको खेलमा डायमण्डले आर्मीलाई ३–१ को सेटमा पराजित गरेको हो । योसंगै डायमण्डले आफ्नो विजयी शुरुवात गरेकोछ ।

जितसँगै डायमण्डले उपाधि जित्ने सम्भावना जीवितै राखेको छ । डायमण्डको दुई खेलबाट ४ अंक छ । पराजित आर्मीको तीन खेलबाट ३ अंक छ । शीर्षस्थानमा रहेको एपिएफको ६ तथा दोस्रो स्थानमा रहेको पुलिसको ५ अंक छ ।

सुरुवाती दुई सेटमा सहज जित निकालेको डायमण्डले तेस्रो सेटमा जित गुमाएको थियो । सुरुवातदेखि नै अग्रता बनाउँदै डायमण्डले पहिलो सेट २५–१८ ले सहजै आफ्नो पक्षमा पारेको थियो ।

प्रतिस्पर्धात्मक दोस्रो सेट डायमण्डले २५–२१ ले आफ्नो पक्षमा पार्दै जिततर्फ अघि बढेको थियो । तर, तेस्रो सेट डायमण्डले २३–२५ ले गुमाएको खेल चौथो सेटमा लम्बिएको थियो ।

चौथो सेटमा सुरुवातमा पछि परेपनि डायमण्डले उत्कृष्ट प्रदर्शन गर्दै २५–२१ ले जित्न सफल भयो । एक समय ९–१३ ले पछि परेको डायमण्डले लगातार ७ अंक जोड्दै खेललाई १६–१३ को स्थितिमा ल्याउँदै जितको बाटो देखाएको थियाए । त्यसपछि डायमण्डले ९ अंक जोड्दा आर्मीले ८ अंक मात्रै जोड्न सफल भयो ।

खेलमा उत्कृष्ट प्रदर्शन गरेकी डायमण्डकी झरना श्रेष्ठ प्लेयर अफ दि म्याच घोषित भइन् ।

एपिएफको लगातार दोस्रो जित

यसैबीच आईतबार भउको पहिलो खेलमा नेपाल एपिएफ क्लबले लगातार दोस्रो जित हात पारेको छ । एपिएफले लुम्बिनी युनाइटेड टिममाथि ३–० को सोझो सेटमा पराजित गर्दै दोस्रो जित हात पारेको हो । एपिएफले लुम्बिनी युनाइटेडलाई २५–८, २५–१२ र २५–८ ले हराएको हो ।

पहिलो खेलमा एपिएफले त्रिभुवन आर्मी क्लबलाई ३–१ को सेटले पराजित गदै विजयी सुरुवात गरेको छ । लुम्बिनी युनाइटेडको यो लगातार तेस्रो हार हो । लुम्बिनी पहिलो खेलमा आर्मी र दोस्रोमा पुलिससँग समान ३–० को सोझो सेटले पराजित भएको थियो । खेलमा नेपाल एपिएफकी सरस्वती चौधरी प्लेयर अफ दि म्याच घोषित भइन् ।

पहिलो खेलमा एपिएफले त्रिभुवन आर्मी क्लबलाई ३–१ को सेटमा पराजित गरेको थियो । एपिएफले लुम्बिनीलाई २५–८, २५–१२ र २५–८ ले पराजित गरेको हो । एपिएफकी जितपछि एपिएफको दुई खेलबाट ६ अंक पुगेको छ ।

लगातार तेस्रो हार बेहोरेको लुम्बिनीले अंकको खाता खोल्न सकेको छैन । लुम्बिनी आर्मी र पुलिससँग समान ३–० को सोझो सेटले पराजित भएको थियो ।

लिगमा तीन विभागीय टोली नेपाल पुलिस क्लब, नेपाल एपिएफ क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब र स्थानीय टोली लुम्बिनी युनाइटेड गरी ५ टोलीको सहभागिता रहेको छ । लिगपछि बढी अंक जोड्ने टोलीले उपाधि जित्नेछ । लिगको विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीलाई २ लाख, तेस्रोलाई १ लाख र चौथो हुने टोलीलाई ५० हजार रुपैयाँ प्राप्त गर्नेछ ।

प्रतियोगितामा सोमबार दुई खेल हुनेछ । पहिलो खेलमा न्यु डायमण्ड स्पोर्ट्स क्लब र नेपाल एपिएफ क्लब तथा दोस्रो खेलमा त्रिभुवन आर्मी क्लब र नेपाल पुलिस क्लबबीच प्रतिस्पर्धा हुनेछ ।