नेपालगन्ज २५ फागुन  : दैलेखकी एक महिला आफ्नो चार सन्तानसहित कर्णाली नदीमा हाम फालेकी छन् ।

विश्वभर श्रमिक महिला दिवस मनाइरहेका बेला सोमबार आठबिस नगरपालिका–३ निमाइलकी ३५ वर्षीया सुकी बडुवाल चार छोराछोरीसहित कर्णाली नदीमा हाम फालेकी हुन् ।

दुई छोरी १४ वर्षीया कल्पना बडुवाल र १२ वर्षीया सरिता बडुवालको शव अछाममा भेटिए पनि अन्य बेपत्ता छन् ।

आमा सुकीसँगै १० वर्षीय छोरा ललित बडुवाल र ५ वर्षीया रजनी बडुवालको शव भेटिएको छैन । उनीहरुको खोजी भैरहेको सहायक प्रमुख जिल्ला अधिकारी हरिप्रसाद देवकोटाले जानकारी दिए । ‘दुई जनाको शव भेटिएको छ । सनाखत पनि भइसकेको छ । अरु तीनजनाको खोजी कार्य भइहेको छ,’ देवकोटाले भने ।

स्थानीयले सुकीले कर्णाली नदीमा हाम फालेको बताए पनि प्रहरीले भने घटनाको वास्तविकता अनुसन्धान भइरहेको जनाएको छ ।

सुकीका श्रीमान मानसिंह बडुवाललाई प्रहरीले नियन्त्रणमा लिएको छ । उनलाई सोमबार बेलुका घर नजिकैबाट पक्राउ गरिएको इलाका प्रहरी कार्यालय राकमले जनाएको छ ।

श्रीमानसँग झगडा परेपछि आफ्ना चार सन्तानसहित सोमबार बिहानै सुकी घरबाट निस्किएकी थिइन् । आईतबार राति मदिरा सेवन गरी घरमा गएका श्रीमानसँग झगडा परेपछि उनी बिहानै निस्किएकी थिइन् ।

घरबाट निस्किएका दुई छोरीको शव भेटिए पनि एक छोरा, एक छोरी र आमाको अवस्था अज्ञात रहेको छ । ८ वर्षीय छोरा ललित बडुवाल र ५ वर्षीया छोरी रजनी बडुवाल र आमाको अवस्था अज्ञात छ । प्रहरीले उनीहरुको खोजी कार्य जारी राखेकोछ ।