बर्दिया ३ भदौ : बहुमूल्य धातुको मुर्तीसहित जिल्ला प्रहरी कार्यालय बर्दियाले ५ जनालाई नियन्त्रणमा लिएको छ ।

बहुमूल्य धातुबाट निर्मित भगवान गौतम बुद्धको मुर्ती किनबेच भइरहेको सूचना पाएको बर्दिया प्रहरीले गुलरिया नगरपालिका स्थित विजया गेष्ट हाउसबाट उक्त बहुमूल्य मूर्ती एक थान सहित पाँच जनालाई नियन्त्रणमा लिएको हो ।

विजया गेष्ट हाउसको कोठा नम्बर ३०८ बाट बरामद गरिएको उक्त बुद्धको मुर्ती सात किलो सात सय २ ग्राम तौल रहेको छ । भने उक्त बुद्धको मुर्तीको उचाई ९.५ ईन्च रहेको छ ।

मुर्तीसहित पक्राउ पर्नेमा गुलरिया नगरपालिका वडा नम्बर–७ का ४० वर्षिय निराजन उपे्रति, मधुवननगरपालिका वडा नम्बर–१ का ३४ वर्षिय उज्वल रोकाय, सोहि स्थानका ३४ वर्षिय अमृत राई, ठाकुरबाबा नगरपालिका वडा नम्बर– ९ का ३२ वर्षिय ईश्वरी प्रसाद उपाध्याय र जाजरकोट जिल्ला बारेकोट गाँउपालिका वडा नम्बर–२ का २९ वर्षिय मगबहादुर नेपालीलाई पक्राउ गरेको हो ।

जिल्ला प्रहरी कार्यालय बर्दियाका प्रहरी प्रमुख प्रहरी उपरीक्षक ईश्वर कार्कीका अनुसार बरामद गरिएको बुद्धको मुर्ती सुन जस्तो पहेँलो धातुबाट निर्मित धेरै वर्ष पुरानो रहेको बुझिएकोछ ।

प्रहरी उपरीक्षक कार्कीका अनुसार पुरातात्त्विक बहुमूल्य उक्त मुर्ती कसले कहाँबाट ल्याइएको हो ? कहाँ विक्री गरिदैँ थियो ? भन्ने लगायतका विषयमा अनुसन्धान भइरहेको छ । उनका अनुसार प्रहरीले बरामद गरेको उक्त मुर्तीको बजार मूल्य करोडौं रुपैयाँ रहेकोछ ।