राप्तीसोनारी ७ माघ : बाँकेको राप्ती सोनारी गाउँपालिकामा ५ सय जनालाई मोती विन्दुको समस्या देखिएको छ । गत पौष २६ देखि माघ ७ गते सम्म सञ्चालन गरिएको निशुल्क आँखा शिविरमा ५ सय जनामा मोती विन्दुको समस्या देखिएको हो ।

डाक फाउण्डेशनको सहकार्यमा राप्ती सोनारी गाउँपालिका र पत्तेवाल आँखा अस्पतालको संयुक्त आयोजनामा गाउँपालिका अन्तर्गतका नौ वटै वडामा शिविर सञ्चालन गरिएको थियो ।

गाउँपालिका अन्तर्गत सबै वडाको स्वाथ्यचौकी तथा आधारभूत स्वाथ्य केन्द्रमा सञ्चालन गरिएको शिविरमा २ हजार ८० जनाले आँखा जाँच गराएकोमा ४५ बर्ष माथि उमेर समुहका ५ सय मानिसहरुमा मोती विन्दुको समस्या देखिएको शिविरमा खटिएका फत्तेवाल आँखा अस्पतालका डाक्टर छन्दुलाल थारुले जानकारी दिए ।

मोती विन्दु कुनै सरुवा रोग होईन, डाक्टर थारुले भने –‘यो मानिसको उमेर बढ्दै गएपछि आफै हुने समस्या हो, जुन ४५ वर्ष पुगेका मानिसहरुमा आँखा धमिलो हुँदै जान्छ र बेलैमा उपचार नगरे जलविन्दु भएर पछि आँखा नदेख्ने समस्या हुन सक्छ ।’

शिविर सञ्चालनका क्रममा धेरैले दुबै आँखामा समस्या भएपनि एउटा मात्र खाँखाको अप्रेशन गरेर बसेको पाईएको डाक्टरको भनाई छ । शिविरमा मोती विन्दुको समस्या देखा परेका सबैलाई फत्तेवाल खाँखा अस्पतालमा रेफर गर्दै आएको र कतिपयको अप्रेशन भईसकेको डाक्टर छन्दुलालले बताए । मोती विन्दुको अप्रेशन गर्दा एकजना बरावर ८ हजार शुल्क लाग्ने भएपनि राप्तीसोनारीको शिविरबाट अस्पतालमा रेफर गरिका सबैको निःशुल्क अप्ररेशन गरिने डाक्टर थारुले बताए ।

गाउँपालिकाको वडा नम्बर १ खासकुस्मा स्वाथ्य चौकीमा उद्घाटन गरिएको शिविरको शुक्रवार वडा नम्वर ४ बैजापुरमा गाउँपालिका अध्यक्ष लाहुराम थारुले समापन गरेका थिए ।

गाउँपालिका अन्तर्गतका कुनैपनि नागरिकले आर्थिक अभावका कारण आँखाको उपचार गराउन समस्या नहोस भन्ने उद्देश्यले निःशुल्क आँखा शिविर सञ्चालन गरिएको गाउँपालिका अध्यक्ष थारुको भनाई छ ।

स्थानीय आयोजक राप्तीसोनारी गाउँपालिका भएकाले शिविरमा ५ सय जना स्थानीयको मोतीविन्दु अप्रेशन शुल्क ४० लाख खर्च गाउँपालिका र अस्पतालले ब्यहोर्ने फत्तेवाल आँखा अस्पतालले जनाएको छ ।